Жұмысшы мамандығының мәртебесін көтеру – қоғамда еңбек адамының қадірін арттыру, оның кәсіби біліктілігін шыңдау, жұмысшы қарым-қабілетін жан-жақты бағалау арқылы жүзеге асатын сан салалы үдеріс. Бұл міндетті шешу үшін кәсіби білім беру жүйесін жетілдіру, біліктілікті арттыру, еңбек жағдайларын жақсарту, еңбекақы мен әлеуметтік кепілдіктерді көбейту сынды кешенді іс-шараларды жүйелі жүргізу қажет.
Жуырда Сарқан аудандық «Мансап» орталығының ұйымдастыруымен Ашық есік күнін өтіп, қатысушылар мәдениет, білім, жұмысшы, есепші, жүргізуші, механизатор салалары бойынша 46-дан астам бос орынға үміткер атанды.
Жиынның басында сөз алған «Мансап» орталығының басшысы Ернар Нұрқасым оқу орнын бітірген жастарға, пробация қызметінде есепте тұрғандарға, мүгедектігі бар азаматтарға мемлекет тарапынан қолайлы көмек түрлері және жобалар жүзеге асып жатқанын мәлімдеді. Оларға жастар практикасы, «Бастау бизнес» бағдарламасы мен мемлекеттік қайтарымсыз гранттар, әлеуметтік жұмыс орындары, мүгедектігі бар азаматтарға қаржылай көмектер қарастырылғанын тілге тиек етсе, аудан әкімінің орынбасары Алмас Байғонысов Мемлекет басшысының саясаты азаматтарды мүмкіндігінше толығымен жұмыспен қамту екендігін нақты мысалдармен жеткізді.
Ашық есік күніне барлығы 80-нен астам жұмыссыз азамат қатысып, Қазақстан Республикасының еңбек нарығын дамытудың 2024-2029 жылдарға арналған тұжырымдамасы аясында жұмыспен қамту шаралары түсіндірілді. Осындай нақты жұмыс нәтижесінде қоғамдық жұмысқа 18 азамат, жастар практикасына 6 азамат, әлеуметтік жұмыс орнына 8 азамат ниет білдіріп, оларға субсидияланатын жұмыс орындарына жолдама берілді. Тұрақты жұмыс орындарына 28 адам қамтылса, оның ішінде мүгедектігі бар 1 жігіт белгіленген квота негізінде жұмысқа орналастырылды. Сонымен қатар, пробация есебінде тіркеуде тұрған 4 адам «Жоңғар Алатауы» МҰТП-не, «Матебаев Ш» шаруа қожалығына, «Ескендір» шаруа қожалығына қоғамдық жұмысқа, «Сарқан су құбыры» ММ-не белгіленген квота негізінде тұрақты жұмысқа орналастырылды.
Жақсылық ИГІМАН
Сарқан ауданы
