Саналы ғұмырын адал еңбекке арнап, ел игілігі үшін қызмет еткен жандар әрдайым құрметке лайық. Сондай жандардың бірі – ҚР ҰҚК шегара қызметі облыстық департаменті кадр бөлімінің инспекторы Раушан Лұқпанова.
Шегара шебінде шыңдалған кейіпкеріміз Шығыс Қазақстан облысы, Өскемен қаласында дүниеге келген. Ол мектепті тамамдаған соң Өскемендегі заң колледжіне оқуға түседі. Аталмыш білім ордасы оның болашақтағы қызметіне жол ашады. Раушан еңбек жолын Зайсан қаласындағы мемлекеттік автомобиль инспекциясынан бастап, кейіннен Өскемен қаласындағы №1 өрт сөндіру бөлімінде кеңсе меңгерушісі болып қызмет істеді. Оның жауапкершілігі мен тиянақтылығы әрдайым басшылық тарапынан жоғары бағаланды.
Раушан әскери салада қызмет істеп жүріп шегарашы офицер Бейбіт Лұқпановты кездестірді. Екеуі отбасын құрып, бір-біріне сүйеу болып, шегара шебінде жолыққан талай қиындықтан бірге өтті. Жолдасы қызмет бабына байланысты түрлі өңірлерде еңбек етті. Азаматымен бірге көшіп жүрген Раушан Қайратқызы түрлі қызметтерді орындап, жұмысын адал атқарды. Шегарашылар сапында радио-телефоншы ретінде талай жауапкершілікті мойнына алған. Раушанның әрбір жұмыс күні тыңғылықты қызмет пен тиянақты еңбектен тұрды. Кейіннен кадр бөлімінің инспекторы қызметіне ауысып, осы салада да өзін жоғары деңгейде көрсетуде.
– Мен үшін ең басты міндет – үйде сүйікті ана, жұмыста Отанға адал қызмет істеу. Тірліктің бір қанаты еңбек болса, екінші қанаты – отбасы, – дейді ол.
Раушан отбасында аяулы ана. Ол Жұлдыз, Жанайым, Нұрайым, Кәусар есімді 4 қыз тәрбиелеп отыр.
Әскери өмір нәзік жанды әйел заты үшін оңай емес. Бүгінде тынымсыз еңбектің арқасында абыройлы болып жүрген жанның жұмысы көпке үлгі.
А. НАЗАРҰЛЫ
Фото: baribar.kz
