Сотталушы Әскентайдың айтуынша, оқиға қарсаңында дүкенде ешқандай жанжал болмаған.
«Сыра сатпаймын деген әңгіме болған жоқ. Ақшамды беріп, сырамды төледім. Аға, рахмет деп кеттім. Кейін ақша салған бауырыма хабарластым», – деді ол сотта.
Бейнежазбаларда сағат 23:53-те Шерзат Болаттың дүкенге кіргені анық көрінеді. Бұл уақытта Әскентай дүкен сыртында сыра ішіп, темекі шегіп тұрған. Мемлекеттік айыптаушының «Неге бірден үйге қайтпадыңыз?» деген сауалына ол:
«Телефоным дүкенде қалып қойған. Оның қуаты аз болғандықтан, аздап зарядталуын күттім», – деп жауап берді.
Бейнежазбада Шерзаттың сағат 00:10-да дүкеннен шыққаны тіркелген. Осы сәтте, Әскентайдың айтуынша, жанжал басталып кеткен.
«Осы уақытта ұрып жібереді мені», – деді сотталушы.
Суд процесінде қорғаушы тарап Шерзат дүкенге кірген кезде қолында бір зат болғанын атап өтті. Судья бұл заттың көліктің кілті екенін айтты. Алайда жәбірленуші тараптың адвокаттары бұл пікірмен келіспей, Шерзаттың оң қолындағы затты экспандер деп болжады.
