Ұйғыр ауданында ұялы байланыс құрылғысының аккумуляторын қолды қылған күдікті қолға түсті. Бұл туралы «Жетісу» газеті хабарлады.
Қаңтар айында Ұйғыр ауданының полицейлеріне Алматы қаласының тұрғыны арызданып, Шонжы ауылында орналасқан ұялы байланыс операторларының біріне тиесілі аккумулятордың қолды болғанын хабарлаған. Тәртіп сақшылары жүргізген тексеру барысында қылмысқа қатысы бар деген күдікке ілінген 24 жастағы жергілікті тұрғын ұсталды.
— Аталған дерек бойынша ҚР Қылмыстық кодексінің 188-бабына сәйкес, сотқа дейінгі тергеу амалдары жүргізілді. Бұлтартпас айғақтардан кейін күдікті өз қылмысын толығымен мойындады. Оның ұрланған аккумуляторды сатып жібергені анықталды. Күдіктінің осыған ұқсас өзге де қылмыстарға қатысы бары тексерілуде. Өзге ақпарат тергеу мүддесінде жарияланбайды, — деді Ұйғыр аудандық полиция бөлімі бастығының міндетін атқарушы, полиция подполковнигі Игорь Калмаков.
Алдын ала тергеу барысында ұсталған адамның бұған дейін де ұрлық жасағаны үшін қылмыстық жауапкершілікке тартылғаны белгілі болды. Сотқа дейінгі тергеу кезінде тұрғын мекенжайын өзгертпеу туралы міндеттемемен босатылды. Тәртіп сақшылары күдіктіден аккумуляторды сатып алған адамдарды анықтады және қолды болған мүлікті қайтару шараларын қабылдауда.
«ЖЕТІСУ-АҚПАРАТ»
Сурет — ғаламтордан
