21 мамырда Талдықорғанда Шерзат Болаттың өліміне қатысты өтіп жатқан сот отырысында марқұмның мәйітінен түсірілген фотосурет сотта ұсынылды, деп хабарлайды 7-su.kz ақпараттық порталы.
Аталған іс бойынша басты айыпталушы – Абзал Шынасылдан сотта жауап алынды. Жәбірленуші тараптың адвокаты Мейірман Шекеев сотталушыға марқұмның денесіндегі жарақаттарға қатысты сұрақ қойды.
Сот барысында марқұмның анасы Гүлбара Бишембиева ұлының бетінде және денесінде жарақаттар болғанын айтты. Осыған байланысты адвокат:
– Бұл жарақаттар туралы не айта аласыз? – деп сұрады.
Айыпталушы Абзал Шынасыл бұл сұраққа қысқаша жауап берді:
– Білмеймін. Мен Шерзатқа қол көтерген жоқпын, – деді ол.
Сот процесі жалғасуда. Іске қатысты толық ақпарат сот отырыстары барысында белгілі болады.
