Талдықорғанда халықты міндетті әлеуметтік медициналық сақтандыру (МӘМС) жүйесіне тарту мәселелері бойынша қалалық штабтың кезекті отырысы өтті.
Шаһар әкімдігінің мәжіліс залында өткен жиынға аймақтағы жұмыспен қамту және әлеуметтік бағдарламалар бөлімінің, полиция және кірістер басқармасының, қалалық емханалардың, «Хак» және «Нұр-Авиценум» медициналық ұйымдарының басшылары қатысты.
Жиналған қауым алдында жеке-жеке сөз алған әр саланың жауаптылары медициналық сақтандыруды жүйелендіру бойынша атқарылып жатқан жұмыстар жайын баян етіп, кездескен кедергілер бойынша өз шешімдерін ұсынды.
Сала басшыларының сөзінше, қазіргі кезде Талдықорған қаласы бойынша 32 мыңнан астам адам міндетті әлеуметтік медициналық сақтандыру жүйесінен тыс қалған. Бұл осы азаматтардың сақтандырудың кеңейтілген пакетімен қамтылмайтынын аңғартады. Атап айтқанда, сақтандырудан қалыс қалған тұрғындарға өз кезегінде медициналық тексерулер, дәрігерлердің қабылдауы мен кеңес беруі, диагностикалық қызметтер және кейбір жоспарлы ауруханаға жатқызу қолжетімсіздікке әкеліп соғады.
Осыған сай жиын барысында сақтандырылмаған қала тұрғындарының санын азайту мақсатында медициналық ұйымдарда қызмет көрсету сапасын арттырып, мобильдік топтардың түсіндіру жұмыстарын күшейту жөнінде тапсырма берілді.
Еске сала кетейік, МӘМС жүйесіндегі мәртебені fms.kz ресми сайттан, Qoldau 24/7 мобильді қосымшасынан, телеграмдағы Saqtandyrybot арқылы немесе eGov.kz электрондық үкіметтегі жеке кабинеттен көруге болады. Ал, жарналарын мемлекет төлейтін жеңілдік санатына мына азаматтар кіреді деп көрсетілген:
— 18 жасқа дейінгі балалар;
— Жұмыс істемейтін жүкті әйелдер;
— Баланы үш жасқа толғанға дейін тәрбиелейтін жұмыс істемейтін адамдар;
— Жүктілікке және босануға, жаңа туған баланы асырап алуға немесе асырап алуға байланысты, сондай-ақ бала үш жасқа толғанға дейін оның күтіміне байланысты демалыстағы адамдар;
— «Алтын алқа», «Күміс алқа» алқаларымен марапатталған немесе бұрын «Батыр ана» атағын алған, сондай-ақ, І және ІІ дәрежелі «Ана даңқы» ордендерімен марапатталған көп балалы аналар;
— Мүгедек баланы күтетін жұмыс істемейтін адамдар;
— Бала кезінен мүгедектерге күтім жасайтын адамдар;
— Мүгедектер;
— Зейнеткерлер мен Екінші дүниежүзілік соғыс ардагерлері;
— Орта, техникалық және кәсіптік, орта білімнен кейінгі, жоғары білім беру ұйымдарында, сондай-ақ жоғары оқу орнынан кейінгі білім беру ұйымдарында күндізгі бөлімде оқитын адамдар;
— Жұмыссыз ретінде тіркелген адамдар;
— Жұмыс істемейтін мемлекеттік атаулы әлеуметтік көмек алушылар;
— Жұмыс істемейтін қандастар;
— Ең төменгі қауіпсіздіктегі мекемелерді қоспағанда, қылмыстық-атқару жүйесі мекемелерінде сот үкімімен жазасын өтеп жатқан адамдар;
— Тергеу изоляторларында отырған адамдар.
Сондай-ақ, азаматтар әлеуметтік мәртебесін egov.kz порталы арқылы тексере алады. Егер адам тізімде жоқ болса, растайтын құжаттардың тізімін жинап, ХҚО-ға тапсыруы қажет. Ақпарат мемлекеттік органдарға растау үшін жіберіледі және жеңілдік санаты берілгеннен кейін, МӘМС жүйесінде мәртебесі «Сақтандырылған» болады.
Айдын КӘЛІМХАН
