Бүгінде Жетісу облысының орталығы Талдықорғанда абаттандыру ісі қолға алынған. Шаһарда көктемгі тазалық науқанынан кейін жолдар ретке келтіріліп, жол белгілері жаңартылып, саябақтар мен көше бойындағы орындықтарды бояу және гүл егу жұмыстары жүргізіліп жатыр.
Талдықорған қаласы әкімінің баспасөз хатшысы Олжас Құрмашевтің сөзінше, наурыз айынан бастап аймақта «Таза Қазақстан» акциясы «Таза өлке», «Киелі мекен», «Жасыл аймақ», «Өнегелі ұрпақ», «Мөлдір Бұлақ» тақырыптарымен өткен. Онда өңір тұрғындары көтемгі тазалық жұмыстарымен қатар ағаш отырғызу басқа да жұмыстарға атсалысқан. Қазір қала көшелері тегіс абаттандырылуда.
– «Биылғы жылы қаланы көгалдандыру және абаттандыру мақсатында қала аумағына 50 мыңға жуық гүл шоқтары егілмек. Қазір тазалық жұмыстары мен қатар, шөп шабу, ағаштарды белгілі бір пішінде ретке келтіру басталды. Сонымен қатар қала аумағындағы арықтар мен арналарды реттеу және су жіберіліп егілген жасыл желектер күтіп баптауда. Мұндай жұмыстар жаз бойы жалғасады», –дейді жауапты сала өкілі.
Айдын КӘЛІМХАН
