Екі тәулік бойы тоқтаусыз жауған қалың қар Жетісу жұртын біраз әубігерге салды. Осыған байланысты қазір облыс орталығында қар тазалау жұмыстары қарқынды.
Талдықорған қаласы әкімінің орынбасары Қуаныш Сейтімбетовтің айтуынша, бұл жолы шаһарды қардан тазартуға 100-ге жуық арнайы техника мен 200-ден астам жұмысшы, сонымен қатар қаладағы 5 саябақ, 40-қа жуық демалыс алаңдарын тазалауға тағы 22 техника мен 118 адам жұмылдырылған. Тазалықшылар алдымен әлеуметтік нысандар мен көлік нөпірі көп көшелерді, одан соң жаяу жүргіншілер жолы мен аялдамаларды тазартуды қолға алған. Осыған дейін жолдарға 1000 тоннадан астам инертті материалдар себіліп, қаланы ақ ұлпадан арылту жұмыстары әлі де жалғасуда.
– Бүгінде Талдықорған қаласын және аймақтағы ауылдық округтердің қысқы күтіміне «АБС-ЛДстрой», «Талдықорған Көркейту», «Шығыс-4», «АБЗ Карьер ДРСУ», «Жетісу Көркем» және «Алан-22» сынды 6 мердігер мекеме жауапты. Қардың толассыз жауыуына байланысты тазалық ісі де күшейтіліп, коммуналдық қызметтер тәулік бойы екі ауысыммен жұмыс жасауда,– дейді шаһар басшысының орынбасары.
Айдын КӘЛІМХАН
