Қазақстан Республикасы Төтенше жағдайлар министрлігінің 30 жылдығына орай Жетісу облысының орталығында арнайы ашық есік күні ұйымдастырылды. Талдықорғандағы «Атамекен» сауда ойын-сауық алаңында өткен іс-шара жастарды өз қауіпсіздігіне жауапкершілікпен қарауға шақырады.
Шара барысында оқушы жастар және басқа да қатысушылар аймақтағы заманауи өрт сөндіру құралдарын көзбен көріп, құтқарушы қызметкерлердің жұмысымен танысты. Осы орайда кәсіби құтқарушылар өрт сөндіру, адамдарды құтқару және алғашқы медициналық көмек көрсету сынды шынайы әдістерді анық көрсетті. Бұл көрсетілімдерден әр азамат нақты мысалдар арқылы заманауи технологиялар мен мамандардың үйлесімді әрекеттері қауіп-қатерлерді жылдам әрі тиімді жоюға қалай көмектесетінін үйренді.
– Ашық есік күні аясында облыстағы департамент бөлімшелерінде оқушыларға арналған танымдық бағдарламалар ұйымдастырылды. Онда мектеп оқушылары әртүрлі құралдарды пайдаланып, алғашқы өрт сөндіруді көзбен көріп, эвакуация кезінде қалай әрекет ету керектігін көріп білді. Сондай-ақ, қауіпсіздік ережелері мен төтенше жағдайлар кезінде қолданылатын пайдалы кеңестер алды. Мұнда қауіпсіздік тек заманауи технологиялар мен құтқарушылардың кәсібилігінің нәтижесі ғана емес, азаматтардың қауіпсіздік мәдениетін қалыптастырудағы маңызды бөлік екенін түсінуге болады. Ережелерді білу және уақытылы дайындық адам өмірін сақтау бағытында қабілеттілікті артырады,– дейді ұйымдастырушылар.
Жауаптылардың сөзінше, ашық есік күні мемлекет, сарапшылар және қоғам арасындағы тығыз ынтымақтастықтың айқын үлгісіне айналды. Бұл өмір мен денсаулықты қорғау жүйесін тиімді құруға мүмкіндік беріп қана қоймай, жас ұрпақты қауіпсіздікке аса жауапкершілікпен қарап, сақтана білуге шабыттандырды.
Айдын КӘЛІМХАН
