Жетісу облысының орталығында «Жұмысшы мамандықтар жылына» орай бос жұмыс орындары жәрмеңкесі ұйымдастырылды. Қаладағы «Атамекен» көрме кешенінде өткен іс-шараға өңірдегі 40-қа жуық жұмыс беруші ұйым қатысып, 380-ге жуық бос жұмыс орнын ұсынды.
Жауаптылардың сөзінше, бұл жолғы жәрмеңкеде қара жұмысшылардан бастап, білікті мамандарға дейін сұраныс жоғары болды. Осы орайда Талдықорған қаласының әкімі Ернат Бәзіл аймақтағы кәсіпкерлерінің қолөнер бұйымдары көрмесімен танысып, жұмыс беруші ұйымдардың өкілдерімен кездесті.
Мамандардың мәліметінше, өткен жылы облыс орталығында 8 мыңнан астам жаңа жұмыс орны ашылып, қала тұрғындарын тұрақты жұмыспен қамту деңгейі артқан. Ал бұл жолғы жәрмеңкеге жұмыс іздеген 500-ден астам адам келсе, олардың басым көпшілігі жастар.
– Халықты тұрақты жұмыспен қамту біздің басты міндетіміздің бірі. Қазір жыл санап қаламызда ірі және шағын кәсіпорындардың саны артып келеді. Осыған байланысты білікті жұмысшыларға сұраныс бар. Ендігі міндет – тұрғындарды қажеттілігіне қарай бос орындарға орналастыру. Бұндай ауқымды жәрмеңкені тоқсан сайын өткізетін болады», – д еді шаһар басшысы Ернат Дүйсенбекұлы.
Айдын КӘЛІМХАН
