Цифрлық жүйе мемлекеттік қызмет көрсету сапасын арттырады. Осыған байланысты бүгінде Жетісу облысының орталығында ауқымды жұмыстар атқарылуда.
Талдықорған қаласы әкімі аппаратының басшысы Ербота Садырқұловтың сөзінше, қазір облыс орталығына қарасты Еркін және Өтенай ауылдары мен бірге қала әкімдігінің 10 құрылымдық бөлімінде көрсетілетін мемлекеттік қызметтің 56 түрі бар. Мәселен, өткен жылы аталған ауылдар мен құрылымдық мекемелерде 27 300-ге жуық мемлекеттік қызмет көрсетілген. Атап айтқанда, оның 17 мыңға жуығы электронды түрде, 9 мыңнан астамы мемлекеттік корпорация арқылы, ал, қалған 1004-і қағаз жүзінде берілген. Сондай-ақ, қала бойынша 54 өзіне өзі қызмет көрсету бұрышы жұмыс істеп тұр. Ел Президентінің Қазақстан халқына Жолдауында «Қазіргі заманда бәсекелестіктегі басым бағыттардың бірі – цифрландыру. Қазақстан үшін де заманауи цифрлық технологияны енгізу мен қолдану маңызды. Осы орайда біз шетелдік серіктестерімізбен белсенді жұмыс істеуіміз керек. Соның ішінде отандық IT секторды ілгерілетуді де ұмытпаған жөн» деп анық атап көрсетілген. Осыған сәйкес бүгінде Талдықорған қаласында цифрландыру жүйесін дамыту ісі қарқынды.
– Қазір аймақта «Smart City» жобасы мен IT хабтары ашылған. Мұнда «Ақылды қала» Талдықорғанның цифрлық болашағы аясында энергия үнемдеуге бағытталған «Ақылды көше жарығы», қауіпсіздікті арттыру үшін арнайы бейнебақылау жүйелері қойылған. Сонымен қатар, жол кептелістерін азайтуға озық үлгідегі бағдаршамдар орнатылуда. Цифрландыру — ел дамуының кепілі. Ол мемлекеттік қызметті оңтайландырады. Жас кәсіпкерлер мен IT мамандарына қолдау көрсету мақсатында ұйымдастырылған кеңес беру, курстар өткізу сынды іс-шаралар азамттарға жаңа цифрлық шешімдер ұсынуда. Бұл бастамалар қарапайым халықтың тұрмысын жақсартып, кәсіпкерлікке тың серпін беріп, облыс орталығын заманауи технологиялық шаһарға айналдыруда маңызды рөл атқарады, – дейді аппарат басшысы Ербота Ғабитұлы.
Айдын КӘЛІМХАН
