Жетісу облысының орталығында масленица мерекесі айрықша аталып өтілді. Шаһардағы «Жастар» саябағында өткен іс-шараға аймақ тұрғындарымен бірге қала әкімі Ернат Бәзіл қатысып, елге амандық, жерге тыныштық тілеп, жиналған қауымға жүрек лебізін жеткізді.
– Бүгінде киелі Жетісу жерінде 100-ден астам ұлт пен ұлыстың өкілі тұрады. Олар бір шаңырақ астында береке-бірлікте өмір сүруде. Бүгінгі мерекелік шара сол татулықтың айғағы. Аймағыздағы дәл осындай мәдени іс-шаралардың тұрақтылық пен этносаралық бірлікті сақтауда, салт-дәстүрді дәріптеп, ұлт құндылықтарын ұлықтауда орны ерекше. Сондықтан да ұлт бірлігінің ұйытқысына айналған мұндай бастамалар бұдан былай да жалғаса беретіні анық»,– деді шаһар басшысы.
Масленица славян халықтарының қыспен қоштасып, көктемді қарсы алатын мерейлі мейрамы. Ұлттық мерекеде славян жұрты адамдарды барлық өкпе-назды ұмытып, қиындықты артқа тастап, келер күннен үлкен үміт күтуге шақырады. Осыған орай, ұйымдастырылған мерекелік шара өңір өнерпаздарының концерттік бағдарламасымен жалғасты. Онда асқақтата шырқалған халық әндері мен мың бұрала орындалған ұлттық билер көрерменді баурады. Осы барыста аймақ жастары арасында құймақ жеу сынды қызықты ойындардан арнайы сайыс өтті.
Ұйымдастырушалардың сөзінше, мереке бір күн емес, бір бапта бойы тойланады. Ол береке мен бірлігі жарасып, ынтымағы мен ырысы артқан жұрттың достық пен бауырмалдығының айғағы. Әр ұлт халқына бейбіт күннің татулығын паш еткен бұл мейрамның орны ерекше. Бұл күні мереке иелері отпен бірге жамандық атаулы құрдымға кетіп, есіктен енген көктем жақсылық әкелетініне сенім білдіреді.
Еске сала кетсек, ежелден ақындар мен батырлардың мекені саналған қасиетті Жетісу жерінде қазір бірлік туын берік ұстанған 105 ұлт пен ұлыс ірге тепкен. Олардың салт-дәстүрді жаңғыртып, ұлт құндылықтарын ұлықтау арқылы өңір мәдениетінің өркендеуі мен қоғамның дамуына қосып отырған үлесі өлшеусіз. Қазір талдықорғандағы Достық үйі ғимаратында ортақ шаңырақ аясында құрылған 20-дан астам этномәдени бірлестіктерінің бөлімі, облыстық ҚХА хатшылығы, Қоғамдық келісім, медиация кабинеті мен Аналар кеңесі және «Ұлағат» ақсақалдар алқасы, сондай-ақ, «Бірлік» жастар қауымдастығы жұмыс жасайды. Сонымен қатар жетекші журналистер, «Парасат» тіл жанашырлары клубы және тілдерді оқыту орталығы бар. Жыл сайын осы орталықтардан әрбір тұрғын өзіне қажетті тіл ілімін меңгеріп, өнер-білімін шыңдауына бар мүмкіндік қарастырылған.
Айдын КӘЛІМХАН
