Ақпан айының 27-ші жұлдызы – Дүниежүзілік үкіметтік емес ұйымдар күні. Осыған сәйкес Талдықорған қаласының әкімі Ернат Бәзіл арнайы басқосу өткізді.
Жиналған қауым алдында сөз алған шаһар басшысы аймақтағы барлық жеке сектор өкілдерін мерейлі мерекемен құттықтап, ізгі тілегін жеткізді.
– Бүгінде Жетісу облысының орталығындағы үкіметтік емес ұйымдар әр сала бойынша құрылған. Олар білім, спорт, мәдениет, халықты әлеуметтік қорғау, жастар саясаты мен балалардың құқығын салаларында белсенді жұмыс жасауда. Сондай-ақ, қоршаған ортаны қорғау мен салауатты өмір салтын насихаттау бағытында да өз үлесін қосып келеді. Талдықорған қаласында жыл сайын үкіметтік емес ұйымдармен бірнеше әлеуметтік жобалар жүзеге асырылады. Бірлестіктер қайырымдылық шараларына да белсене ат салысып, қала тұрғындарына, әлеуметтік жағынан аз қамтылған отбасыларға өз көмектерін көрсетуде. Сондықтан сіздерге айтар алғысымыз шексіз,– деді қала әкімі.
Осыдан соң Ернат Дүйсенбекұлы өңірдің дамуына өз үлесін қосып жүрген 20-дан астам үздік бірлестік жетекшілерін марапаттады.
Басшылардың сөзінше, бүгінде елімізде үкіметтік емес ұйымдардың тұтас саласы қалыптасқан. Бұл секторлар саясат сахнасынан құқық қорғау, әлеуметтік, экономика салалары мен қайырымдылыққа дейін барлық бағытта қызмет атқаруда. Осыған сай қазір Талдықорған қаласы бойынша 394 үкіметтік емес ұйым тіркелген. Олар әр бағытта еңбек етуде.
Еске сала кетсек, аталған күн халықаралық деңгейде алғаш рет 2014 жылғы 27 ақпанда Финляндияның Хельсинки қаласында мерекеленген. Осы күні бүкіл әлемде азаматтық сектордың қоғамның барлық салаларын дамытуға қосқан үлесі туралы жан-жақты айтылған. Сондай-ақ, мереке Дүниежүзілік үкіметтік емес ұйымдардың жаһандық құндылықтарын, ұмтылыстары мен нәтижелерін көрсетеді.
Айдын КӘЛІМХАН
