Жетісу облысының орталығында «Жігіт сұлтаны» байқауының жеңімпаздары анықталды. Шаһардағы Өтенай ауылдық мәдениет үйінде өткен іс-шара Ұлы Жеңістің 80 жылдығына арналған.
Байқаудың басты мақсаты – қазақтың салт-дәстүрлерін, өнерін кеңінен дәріптеп, ұлт құндылықтарын ұлықтау. Сонымен бірге жастарды елін, жерін құрметтеуге, отансүйгіштік пен батырлыққа, адалдыққа тәрбиелеу. Екі кезең бойынша іріктелген сайысқа 18-29 жас аралығындағы Талдықорған қаласы аумағындағы әскери бөлімшелердің сарбаздары мен колледж студенттерінен 14 жігіт қатысып, спорт және өнер бағытында бақ сынасты.
Жиналған қауым алдында сөз алған Талдықорған қаласының әкімі Ернат Бәзіл үміткерлерге сәттілік тілеп, жылы лебізін жеткізді.
– Жастар – елдің ертеңі, ұлттың болашағы. Тәрбиелік мәні зор мұндай шаралар оларға үкілі үміт пен жалынды жігер сыйлайды. Әрі азаматтарды адал адамгершілік пен бауырмалдылыққа баулиды. Сондықтан мен әр қатысушының топ жарып жүлделі орындардан көрінуіне тілектеспін,– деді қала әкімі.
Бір күн бойы жалғасып, тартымды да тартысты өткен ақтық сынның қорытындысы бойынша жеңімпаздар анықталып, оларға бағалы сыйлықтар мен диплом және қаржылай сертификаттар табыс етілді. Осы орайда Дархан Бақтыбаев есімді Талдықорған қаласының тұрғыны «Жігіт сұлтаны-2025» байқауының бас жүлдегері атанды.
Айдын КӘЛІМХАН
