Жетісу облысының орталығында аймақ басшысының тапсырмасына сай жылу жүйелерін қайта жаңғырту жұмыстары қолға алынған.
Атап айтсақ, өткен жылы Талдықорғандағы Гагарин, Алдабергенов, Қаблиса жырау, Жансүгіров және Қабанбай батыр көшелерінде жалпы ұзындығы 5 жарым шақырымға жуық жылу құбыры ауыстырылған болатын. Сондай-ақ, қолға алынған Абай, Дарабоз ана, Қабанбай батыр мен Балпық би көшелеріндегі 1,8 шақырым жердегі құбыр салу ісі алдағы маусым айында толық аяқталады деп жоспарланған. Сонымен қатар биыл шаһардағы өткен ғасырдың 80-90 жылдары салынған жылу жүйелерін жаңарту жұмыстары жалғасып, Жансүгіров көшесіндегі жалпы ұзындығы 3,4 шақырым, кеңдігі 700м магистралды жылу желісін жаңғырту жобасы әзірленуде.
– Бүгінде Талдықорған қаласын жылумен және ыстық сумен қамтып отырған 10 қазандық бар. Ал, ең үлкен «Басқуат» жылу қазандығының жүктемесін азайту үшін қосымша тағы «Оңтүстік-Батыс» тұрғын ауданында тағы бір кварталдық қазандық салынуда. Қазір онда құрылыс монтаждау жұмыстары жүргізіліп жатыр. Осының барлығы болашақта аймақтағы жылыту маусымы кезінде апатты жағдайлардың алдын алып, қаланы үздіксіз жылумен қамтуға мол мүмкіндік береді, –дейді сала басшылары.
Айдын КӘЛІМХАН
