Жетісу облысының орталығында бағдаршамдар дыбыстық құрылғылармен жабдықтала бастады. Мүмкіндігі шектеулі жандарға арналған бұл жабдық елімізде тұғыш рет Талдықорған қаласында орнатылып сынақтан өткізілмек. Жаңа құрылғының басты ерекшелігі – көзі көрмейтін, құлағы нашар еститін жандар үшін және қарттар мен балалардың көшеден өтуіне өте қолайлы әрі қауіпсіз.
Талдықорған қаласы әкімдігіндегі мамандардың сөзінше, аталған дыбыс құрылғысын Назарбаев зияткерлік мектебінің түлектері және «it-service Education» жастар қоғамдық бірлестігінің мүшелері ойлап тапқан. Қазіргі уақытта бұл құрылғыға сұраныс жоғары және ерекше қолдауға ие.
– Бүгінде ерекше күтімді қажет ететін жандарға қолайлы орта қалыптастыру басты міндет. Мұндай арнайы дыбыс құрылғылары қазір Талдықорған қаласындағы Назарбаев даңғылы мен Рүстембеков, Қонаев және Балапанов сынды бірнеше көшенің қиылысына орналастырылды. Бұл жұмыстар бұдан әрі де жүйелі түрде жалғасын тауып, қаладағы басқа да көшелердегі бағдар шамдары дыбыстық құрылғылармен жабдықтау жоспарда, – дейді қалалық жұмыспен қамтуды үйлестіру және әлеуметтік бағдарламалар бөлімінің басшысы Мади Шакенов.
Айдын КӘЛІМХАН
