ҚР Сауда және интеграция министрлігінің Сауда және тұтынушылардың құқықтарын қорғау департаментінің басшысы Айдос Дауешев тұтынушылардың құқықтарын қорғау саласындағы қоғамдық бірлестіктің өкілімен бірлесіп азаматтарды қабылдады.
Азаматтарды қабылдау барысында Департамент басшысы бірқатар өтініштерді қарап, «Тұтынушылардың құқығын қорғау туралы» Қазақстан Республикасының Заңы шеңберінде құқықтық көмек көрсетті.
Қабылдауға Талдықорған қаласының 20-дан аса тұтынушысы жүгініп, олар «Б» есімді жеке кәсіпкердің «9» атты дүкенінен «алдын ала тапсырыс» бойынша жарты жылдан бері өз телефондарын ала алмай және төлеген ақшаны қайтара алмай жүргендігіне шағымданды.
Бұл дүкен өз өнімдерін әлеуметтік желілерде жақсы жарнамалап, «қосымша сыйлықтар мен жақсы жеңілдіктер» уәде еткен.
Алайда тұтынушылар телефондарды да, сыйлықтарды да көрмеген.
Бүгінгі таңда жосықсыз кәсіпкердің қолынан 20-дан астам адам шығынға ұшырады, ал Департаментке 2024 жылғы 30 желтоқсандағы жағдай бойынша барлығы 12 азамат жүгінді.
Шығын сомасы қазірдің өзінде 7 миллион теңгеден асты, бірақ бұл сома да, зардап шеккендердің саны да көп болуы мүмкін.
Департамент басшысы «Тұтынушылардың құқығын қорғау туралы» Қазақстан Республикасы Заңының 29-бабының 5-тармағына сәйкес сатушы тұтынушыға үлгіге және (немесе) сипаттамаға сәйкес келетін тауарды беруге міндетті екенін атап өтті.
Сондай-ақ, департамент басшысы «9» дүкені тарапынан тұтынушының шағымына уақтылы жауап бермеуге қатысты «М» есімді тұтынушының өтініші негізінде «Б» есімді жеке кәсіпкерге қатысты жоспардан тыс тексеру жүргізілгенін атап өтті.
Азаматтарды қабылдау барысында Департамент басшысы Айдос Дауешев тұтынушыларға Департамент «Б» жеке кәсіпкерге қатысты өзінің шарттық міндеттемелерін орындамағаны үшін ақшалай қаражатты өндіріп алу туралы сотқа талап арыз дайындап жатқанын хабарлады.
Жалпы, Жетісу облысында тұтынушылардың құқықтарын қорғау саласындағы өтініштер саны артып келеді. Мысалы, 2024 жылғы 30 желтоқсандағы жағдай бойынша Департаментке 1197 өтініш келіп түсті, оның ішінде 551 өтініш оң шешілді, тұтынушыларға барлығы 53 073 845 теңге қайтарылды.
«Жетісу-Ақпарат»
