Қаңтар айының басы халыққа ауыр тиді. Кім дос, кім дұшпан, айыра алмай қалдық. Тек Президенттің айтқанымен үйден шықпай, сабыр сақтадық. Бұл орайда ел ауызбірлік танытты.
Елді мекендерді бүлікшілерден тазартқанша әскерилерге кедергі жасамауға тура келді. Көптің көшеде, қала арасында сапырылыспауы құқық қорғаушылардың жұмысына да өз септігін тигізді. Ақ пен қараны ажырата алмай қалуымыздың себебі, бейбіт шеруге шыққандардың талабын лаңкестердің басқа жаққа бұрып жіберуінде болып тұр. Бір-екі күнде бірнеше қаланың астан-кестеңі шықты.
Осындай бүлікті жерімізге көз салып отырған басқа елдер пайдаланып кете ме деп қорықтық. Тәуелсіздіктен айырылып қаламыз ба деген де қорқыныш сананы сілкіндірді. Ата-бабам аңсап, ғасырлар бойы жан-жақтан анталаған жауды тойтарып, қол жеткізген Тәуелсіздіктен енді айырылсақ, алпауыттардың аузына тұтылуымыз әбден мүмкін. Талай ел дәл солай жер бетінен жойылғаны тарихтан белгілі.
Жерің мен тілің болмаса кімсің?! Әрине, мүсәпірсің. Одан кейін сені ешкім сыйламайды, санаспайды. Осы орайда бар үмітіміз ел Президенті Қасым-Жомарт Тоқаевта еді. Бар сенеріміз де, сүйенеріміз де сол кісінің шешімдері мен елжандылығына тірелді. Жазушының баласы отаншыл ұстанымынан ауытқымауы керек. «Әкеден ұл тусайшы, әке жолын қусайшы» демеуші ме еді?! Минуттар мен секундтарға дейін үлкен маңызға ие болып, Алашұранды елдің тағдырын шешуге жұмсалды. Президентіміз ел үмітін ақтады! Бір күнде елдің болашағына қауіп төндіретін, пиғылы арам бірнеше адамды қызметтен аластатты. Орнына сенімді адамдарды қойды. Бәрінен мемлекеттің мүддесін жоғары қоятынын айтты. Тізгінді мықтап ұстады. Қандай жағдай болса да елмен бірге екенін мәлімдеді.
Осылайша, елдің ертеңгі күнге деген сенімін арттырды. Қауіпсіздік кеңесі төрағасының тізгінін қолына алды. Оған бәріміз қуандық. Қорғаныс күшін күшейту керек болды. Президент Қасым-Жомарт Тоқаев Ұжымдық қауіпсіздік шарты ұйымынан көмек сұрады. Дәл сол сәтте бұл өте орынды шешім еді. Әйтпесе, лаңкестердің беталысын қайтару қиынға соқты. Бірнеше ұшақ әскердің көмекке келуі бүлікшілерге психологиялық тойтарыс берді. Елордаға үш бірдей әскери ұшақтың келгенін білген содырлар Президенттің резиденциясына басып кіру жоспарынан айныды. Олар билікке солай жетпекші болған. Бірақ ұшқыр ойлы Президент айлакерлердің алдын орады. Халықты сын сағаттан аман алып қалғаны үшін Қасым-Жомарт Тоқаевқа айтар алғысымыз шексіз.
Енді бір мәселе, мына аузым бар деп сөйлей беретіндерге бір шара қолданылса деген ұсыныс айтқым келіп отыр. Әсіресе, интернеттегі кейбір блогер, белсендісымақтар көптің санасын улап, адастырып жатыр. Ел ішінде дүрбелең тудыратын, көпті бағытынан адастыратын ұрандар жазуда. Кейбіреулері Президентке де тіл тигізеді. Оның шешімін халыққа дұрыс емес деп түсіндіруге күш салады. Сыбайластыққа қарсы қоғам құру жайлы бағытты өзгертіп, өздерінің кесірлерін тигізіп бірді-бірге айтақтауда. Билік пен бас пайдасын ғана ойлайтындар елге «қамқор» болмақшы. Бұларға халық болып қарсы шығуымыз керек. Аздырушылардың бетін біржолата қайтарып тастасақ болар еді. Әйтпесе, интернеттегінің бәрін дұрыс ақпарат деп ұғатындар ұрандап, солардың соңынан еріп кетуі әбден мүмкін. Президент айтпақшы, мақсатымыздың басында ел мүддесі тұруы тиіс. Қазақтың бағына билікке адал перзенті келді. Ендігі біздің міндет – басшы біреу, қалғаны оған тіреу болып, ел бірлігін сақтау.
Аманғазы ШЕГІРОВ,
Алматы облысының Құрметті азаматы
