Қала әкімдігінің мәліметінше, басқосуда шаһар басшылары екі ел арасындағы ынтымақтастыққа сай өзара әріптестік қарым-қатынас мәселелерін кеңінен талқылаған. Атап айтқанда, тараптар сауда-экономикалық байланыстарды кеңейту, «жасыл» энергетика, туризм, мәдени-гуманитарлық бағыттарда әріптестікті дамыту және инвестиция тарту мүмкіндіктерін қарастыруды көздейді. Сонымен бірге олар ауыл шаруашылығы өнімдерін өңдеуге арналған бірлескен жобаларды іске асыру, білім мен ғылым, мәдениет салаларында тәжірибе алмасу бойынша да ортақ ой бөліскен.
Сөз кезегінде Ернат Дүйсенбекұлы делегация ұсынған бастамалар мен жобаларға қолдау білдіретінін айтып, екі ел арасындағы мәдени және экономикалық байланыстардың одан әрі нығая түсетініне үлкен сенім білдірген.
Еске сала кетсек, жақын уақытта дәл осы Шэньси өлкесінде жерленген ұлы қолбасшы, қазақтың қас батырларының бірі Мұқалыға арналған еңселі ескерткіш бой көтермек. Шамамен 1170 – 1223 жылдар аралығында өмір сүрген Мұқалы Шыңғыс ханның төрт ірі қолбасшыларының бірі ретінде танылған тарихи тұлға. Әрі ол империядағы әйгілі тоғыз төренің бірі.
Айдын КӘЛІМХАН
