Жауаптылардың сөзінше, Талдықорғанға облыс орталығы мәртебесі берілгеннен бері еш жөндеу көрмеген бұл аумақ ұзақ жылдар бойы жабайы сауда алаңына айналып келген. Бұрын мұндағы жолдың екі жағасына тізілген түрлі жеміс-жидектер мен басқа да тауарлардан аяқ алып жүргісіз болатын. Тіпті, саудагерлер жаяу жүргіншілер жүретін жолға дейін иеленіп алған. Оның үстіне жол шетіне иін тірестіре қойылған сатушылардың және такси жүргізушілерінің көліктерінен жұрттың базарға кіріп шығуы әбден қиындаған. Мұндай келеңсіздіктерді жойып, базар аумағын ретке келтіру мақсатында биылғы жылдың көктемінде Арбат аумағына абаттандыру жұмыстары жүргізіле басталған. Қазір қолға алынған істер негізінен аяқталып, аумақ тегіс жаңартылған.
Құрылыс алаңын аралау барысында Ернат Дүйсенбекұлы атқарылған жұмыстардың сапасына баса назар аударып, орындалған істерге оң баға берді. Сондай-ақ, ол жаңадан салынған Арбат қала тұрғындары үшін тағы бір жайлы демалыс орнына айналатынын тілге тиек етіп, оны ұқыпты әрі таза ұстау көпке ортақ екенін ескертіп, бұдан былай бұл жерде бейберекет сауда сатуға қатаң тиым салынатынын жеткізді.
– Құрметті Талдықорған қаласының тұрғындары! Бүгін біз жаңа Арбатты техникалық тұрғыда іске қосып отырмыз. Заман талабына сай абаттандырылған жаңа Арбат алдағы уақытта қала тұрғындарының тағы бір жайлы демалыс орнына айналмақ. Қазір сіздер бұл аумақтың толықтай абаттандырылғанын байқаған боларсыздар. Қала әкімі ретінде сіздерден өтінерім егер серуендеу немесе сауда жасау барысында мұнда рұқсат етілмеген жерде сауда сатқандарды байқасаңыздар, оны фото немесе видеоға түсіріп, 102 немесе 109 нөміріне жолдауларыңызды сұраймын. Біз жедел әрекет етеміз. Арбаттың және қаламыздың гүлденуіне ортақ ат салысайық!» — деді шаһар басшысы.
Айдын КӘЛІМХАН
