Талдықорғанда полиция мен ПИК өкілдері аулаларды бірлесіп аралады, — деп хабарлайды 7-su.kz ақпараттық порталы Polisia.kz сайтына сілтеме жасап.
Талдықорған қаласында жергілікті полиция қызметі белсенді тұрғындар мен пәтер иелері кооперативінің (ПИК) өкілдерімен бірлесіп, аулаларда рейдтік іс-шара жүргізді. Шараның басты мақсаты – тұрғындардың қауіпсіздігі мен жайлылығына кері әсер ететін мәселелерді анықтап, оларды жою бағытында нақты әрекеттер қабылдау.
Рейд барысында аулалардың жарықтандырылуы, бейнебақылау камераларының орнатылуы және олардың жұмыс істеу жағдайы, балалар ойын алаңдарының техникалық күйі сынды маңызды мәселелерге баса назар аударылды. Тексеру нәтижесінде кейбір аулаларда жарықтың жоқтығы, істен шыққан бейнекамералар және балалар үшін қауіпті ойын жабдықтары секілді бірқатар олқылықтар анықталды.
Барлық кемшіліктер тиісті түрде тіркеліп, оларды жою мақсатында жергілікті атқарушы органдарға ресми нұсқама жолданды. Бұл шаралар құқық бұзушылықтардың алдын алу, қоғамдық қауіпсіздікті қамтамасыз ету және тұрғындарға қолайлы өмір сүру ортасын қалыптастыруға бағытталған.
Талдықорған қаласының полиция қызметі белсенділік танытып, қоғамдық іске үлес қосқан ПИК өкілдері мен тұрғындарға алғысын білдіреді. Сондай-ақ осындай бірлескен жұмыстарды алдағы уақытта да жүйелі түрде жалғастыруға ниетті екенін жеткізді.
