Жиналған жұрт алдында сөз алған Талдықорған қаласының әкімі Ернат Бәзіл жалпы қатысушы қауымға алғыс айтып, ізгі тілегін жеткізді. Сондай-ақ, ол мұндай шаралар бұдан былай да жалғаса беретінін атап өтті.
– Спорт денсаулық кепілі. Бүгінде қаламызда көптеген спорттық нысандар жұмыс жасауда. Онда азаматтардың спорттың кез келген түрімен жаттығуына мүмкіндік мол. Сонымен қатар шаһарда көптеген жаттығу және аулаларда спорттық алаңдар салынуда. Бұл аймақ тұрғындарының салауатты өмір салтын ұстанып, балаларды жастайынан спортқа баулуға бағытталған», –деді шаһар басшысы.
Ұйымдастырушылардың сөзінше, қала әкімінің қатысуымен өткен велошеру осымен жетінші мәрте өткізілуде. Шараның басты мақсаты –жұртқа салауатты өмір салтын ұстануды кеңінен дәріптеп, бұқаралық спорттың дамуына қолдау көрсету. Талдықорғандағы Қадырғали Жалаири даңғылынан бастау алған түнгі велошеруге жалпы 300-ге жуық адам қатысқан. Олар 6 шақырым жол басып шеруді орталық алаңда түйіндеген. Бұл жолғы түнгі шеруге қатысушылар арасында аймақтағы кәсіби велосипедшілер, мемлекеттік қызметкерлер және қала тұрғындары бар.
Шара соңында шеруге қатысушылар арасында арнайы лоторея ойындары ойнатылып, жеңімпаздарға бағалы сыйлықтар табысталды.
Айдын КӘЛІМХАН
