Талдықорған қаласында жас өнерпаздардың басын қосқан дәстүрлі облыстық фестиваль-байқау өтті. Биылғы өнер додасына өңірдің түкпір-түкпірінен 140 бала қатысып, өз шеберлігін ортаға салды.
7 мен 17 жас аралығындағы өрендер үш жас ерекшелігі бойынша сынға түсті. Домбыраның күмбірі, фортепианоның әуезі, хор ұжымдарының үйлесімді үні – көрерменге ерекше әсер сыйлады. Ұйымдастырушылар мұндай байқаулар ұлттық өнерді ұлықтаудың маңызды тетігі екенін айтты.
Шара облыстық білім басқармасының қолдауымен өтті. Негізгі мақсат – оқушылардың музыкалық-эстетикалық тәрбиесін жетілдіру, шығармашылық әлеуетін арттыру және өнер мектептерінің жұмысын дамыту. Бұл туралы облыстық білім басқармасы ғылыми-тәжірибелік орталығы директорының орынбасары Ақбаян Суниятова атап өтті. Оның сөзінше, байқау жеңімпаздары алдағы республикалық кезеңге жолдама алып, өңір намысын қорғайтын болады.
Сахнаға алғаш рет шығып отырған қатысушылар да аз емес. Солардың бірі – фортепиано сыныбы бойынша өнер көрсеткен Кәусар Есімова. Ол пианиноға бір жыл бұрын ғана келгенін, бірақ облыстық жарысқа алғаш рет қатысып отырғанын айтты.
– Пианино ойнаған кезде аздап қорықтым. Бірақ маған аспапта ойнаған ұнайды. Себебі ол адамды дамытады, – дейді жас өнерпаз.
Ақсу ауданы, Исатай Исабаев атындағы өнер мектебі жанындағы «Балауса» хор ұжымы бұл байқауға екінші жыл қатарынан қатысуда. Ұжым мүшесі Еркежан Нұрланқызы:
– Бұл жер балалардың шыңдалуына көмектесетін өте керемет деңгейдегі сайыс, – дейді. Расында да, мұндай дода жас өнерпаздарды жауапкершілікке, тәртіпке және кәсіби шеберлікке баулиды.
Байқау қорытындысында Н. Тілендиев атындағы балалар музыка мектебінің оқушысы Илария Этенко, орта жас топтар арасында «Жеке орындаушы» номинациясы бойынша балалар өнер мектебінің шәкірті Леон Ким, ересек топтар арасында «Жеке орындаушы» номинациясында Анита Ким, музыкалық ұжымдардың өнер көрсетуінде Ақсу ауданы И. Исабаев атындағы өнер мектебі Бас жүлде иегерлері атанды.
Топ жарып шыққан жеңімпаздар енді Астана қаласында өтетін республикалық кезеңде бақ сынамақ. Бұл олардың шығармашылық жолындағы жаңа белес, үлкен сахнаға бастар қадам.
Жас өнерпаздардың жалындаған талабы мен сахнадағы сенімді қадамы өңір мәдениетінің ертеңіне деген сенімді нығайта түседі. Талантқа қолдау бар жерде руханияттың тамыры тереңдей беретіні сөзсіз.
Медет ЖҰМАБАЙ
