Құтқарушы кез келген қиындықтарға төтеп беріп, халықтың өмірі мен мал-мүлкін қорғау жолында еңбек ететін ерекше мамандық иесі. Осыған байланысты Талдықорған қаласындағы біраз оқушылар мен студенттер аймақтағы Төтенше жағдайлар департаментіне барып, апаттық жағдай орын алған кезде қалай әрекет етудің қыр сырын үйренді.
Құтқарушылармен өткен бір күнінде жастар Жетісу облыстық Төтенше жағдайлар департаментінің қызметімен танысты. Әрі «Құтқарушының кезекші ауысымынан бір күн» және «Ашық есік күні» сынды акциялары аясында өрт сөндірушілердің жұмысына саяхат жасап, өмірлік маңызы бар дағдыларды меңгерді. Аталмыш іс-шараға қатысушылар «құтқарушы болу нені білдіреді әрі қауіпті жағдайда қалай әрекет ету керек? Өрт немесе басқа да апаттық жағдай кезінде не істеу қажет?» сынды сауалдарға теориялық тұрғыда емес, нақты тәжірибе жүзінде жауап алды.
Сала мамандарының сөзінше, құрғақ теорияның орнына интерактивті тәжірибенің мәні зор. Мұнда қатысушылар әртүрлі құралдарды пайдаланып, алғашқы өрт сөндіруді көзбен көріп, эвакуация кезінде қалай әрекет ету керектігін үйренді. Осы орайда олар гидравликалық қайшылар, өрт сөндіру жеңдері, құтқару құрылғылары мен іздеу-құтқару операцияларында қолданылатын дрондардың жұмысын көзбен көрді. Негізі құтқарушы болу – қырағалықты, батылдықты, табандылықты және жоғары кәсіби дайындықты талап етеді.
Шара барысында департамент өкілдері оқушыларға тек тәжірибелік сабақтар өткізіп қана қоймай, М. Ғабдуллин атындағы азаматтық қорғау академиясына оқуға түсу мүмкіндіктері туралы айтып берді. Көптеген қатысушылар осы шарадан соң өздерінің құтқарушылыққа қызығушылық танытып, болашақ мамандықтары туралы ойлана бастағанын жеткізді.
– Мұндай іс-шаралар қауіпсіздік мәдениетін қалыптастырып, жастардың құтқарушылардың еңбегін терең түсінуіне жол ашады. Бәлкім, бүгінгі шараға қатысқандардың бірі болашақта осы салада, өзгенің өмірін сақтау жолында еңбек ететін азамат болатын шығар. Ол – алдағы уақыттың еншісіндегі іс. Сондықтан да оқушыларды жастайынан әр мамандықпен жан-жақты таныстырып, шеберлікке баулу бәрінен маңызды,– дейді ұйымдастырушылар.
Айдын КӘЛІМХАН
