Қарғын судың алдын алу, өзендер мен каналдарды тазалап, арықтарды қалыпқа келтіру жұмыстары әр елді мекенде қарқынды жүріп жатыр. Ал гидрологиялық болжам бойынша су басу қаупі жоғары Алакөл, Ескелді, Кербұлақ және Көксу аудандарындағы жұмыс бақылауда. Қаңтардың аяғында арнайы комиссия құрылып, аталған мәселе бойынша жүйелі жұмыс істеп келеді. Жалпы, облыс бойынша су басу қаупі бар 47 елді мекен анықталып, 43 ауыл-аймақта уақытылы жұмыс жүргізіліп, қауіпті азайтса, 4 елді мекенде жұмыс жоспар бойынша атқарылуда.
Көксу ауданындағы Жарлыөзек, Мұсабек, Талапты және Мұқыры ауылындағы каналды тазартуға 34 техника, 84 адам іске кіріскен. Одан бөлек 1500 тоннадан астам инертті материал мен 12 дана батпақты мотопомпа дайын. Ал «ҚазСушар» мекемесі Жарлыөзектегі 2 шақырым каналды тазалап тереңдетіп жатса, жергілікті әкімдік Мұсабекте 1,2 шақырым су бұру арнасын тазартқан.
Мұсабек ауылының әкімі Ербол Тантыбай: «Ауылымыздағы 1,2 шақырым қауіпті аймақ болып белгіленген еді. Қар суын тоқтату үшін каналды тереңдетіп қазып жатыр. Тасқынның алдын алу жұмыстары жүйелі жүріп, әр іс бақылауда», – деді. Ал Көксу аудандық әкімі аппаратының бас маманы Нарұл Абайұлының мәліметінше жалпы аудан бойынша арнайы су бұру каналдарын тазарту жұмысына 20.8 миллион теңге қаражат бөлінген. Бүгінде су тасқынының алдын алу бойынша ауданда 2 елді мекен қалды, жақында аяқталады.
Ал Ескелді ауданындағы 4 ауылдық окургте тасқынның алдын алу бойынша бірқатар іс қолға алынған. Әсіресе, осыған дейін су басып, үйді алып, ауланы шайып кеткен Ешкіөлмес ауылында арықтарды механикалық тазарту, тереңдету, одан бөлек аудан аумағындағы Көксу өзенінің жағалауын бекіту жұмысы қарқынды жүруде. Ауданда 85 адам мен 44 техника іске кіріскен. Абайдағы Бақтыбай көшесінің жоғарғы жағын, Қарабұлақтағы «Мелькомбинат» учаскесін, Ешкіөлместегі Шереметьев көшесінің бойындағы арықты тазарту бойынша іс тиянақты аяқталған.
Тілшілерге сұхбат берген облыстық ТЖД басқарма басшысы Ринат Тазабеков: «Казгидрометтің ақпаратынша биыл қар қалың болды. Сондықтан Көксу, Ескелді, Кербұлақ аудандарындағы бірнеше елді мекен су басу қаупі бар аймақ саналды. Ал тасқынның алдын алу жұмыстары тұрақты жүргізілуде», – деді.
Ресми мәлімет бойынша облыста көктемгі су тасқынына қарсы жұмысқа төтенше жағдайлар департаментінің 1573 жеке құрамы тартылған. Аудан және қала әкімдерінің ақпаратына сүйенсек, су тасқынына қарсы іс-шарада 2 372 шақырым арық жүйесі, 768 шақырым канал, 3 389 бірлік су өткізу құрылысы тазартылып, елді мекендерден 21 мың м3 қар шығарылған. Сонымен қатар 572 техника, 201 мотопомпа және 31 жүзу құралы әзір. Жалпы Жетісу облысында төтенше жағдай кезінде тұрғындарды қабылдайтын 2235 эвакуациялық пункт бар.
Серік ҚАНТАЙ
Көксу – Ескелді аудандары
