Облыстық қоғамдық даму басқармасы жұмыссыздық деңгейін төмендету және ауылшаруашылығы саласындағы жобаларды іске асыруға қолдау көрсету мақсатында «Тәуелсіздік ұрпақтары» грантына өтініштер қабылдауды бастады. Осыған орай Бейсен Құранбек атындағы Журналистер үйінде облыстық қоғамдық даму басқармасының бас маманы Жанерке Бексейітова мен «Жетісу жастары» мемлекеттік коммуналдық басқармасының директоры Шәміл Ванкеев баспасөз мәслихатын өткізді.
Жанерке Бейбітқызының айтуынша, құжаттарды облыста тұратын, 18-34 жас аралығындағы жұмыссыз жастар тапсыра алады. Құжат қабылдау 15 шілдеге дейін жүргізіледі. Жобалар 6 бағыт бойынша ұсынылады. Гранттар облыс тұрғындарына жаңа идеялар мен бастамаларды іске асыру үшін конкурстық негізде беріледі.
Қаржы ірі қара, ұсақ мал, құс, ара, балық өсіру және оларға қатысты қосалқы шаруашылықтар жүргізушілерге ұсынылады. Өсімдік шаруашылығы – жылыжайда қияр, қызанақ, бұрыш өсіруге конкурс бойынша беріледі. Конкурсқа бидай, арпа, жүгері, күнбағыс, соя, қант қызылшасы, пияз, картоп өсірумен шұғылданушылар де қатыса алады. Жанерке: «Сүт өнімдерін өңдеушілер де конкурсқа қатысып, грантқа ие бола алады. Сүзбе және басқа да сүт тағамдарын өндірушілер, сондай-ақ, ауылшаруашылығы өнімдерін қайта өңдеушілер өтінім бере алады. Бұған көкөніс, жеміс-жидек, ет, балық, сүт, дәнді дақылдарды консервілеу, кептіру, орау және басқа да өңдеу түрлері жатады. Қолөнер және шағын өндіріс жүргізуге грант ұсынылады. Бұған ұлттық және заманауи қолөнер бұйымдарын (тоқыма, ағаш, металл, тері, зергерлік заттар жасау және сату) өндіру жатады. Агро және экотуризм – ауылдық демалыс нысандарын ұйымдастыру, фермерлік экскурсиялар, ауылшаруашылық өнімдерін ұсыну және туризммен байланысты басқа да қызмет түрлері гранттық негізде қаржыландырылады», – деп атап өтті.
Шәміл Дүйсенғазыұлының айтуынша, әрбір жеңімпазға 3 000 000 (үш миллион) теңге көлемінде грант беріледі. Жоба таныстырылымы слайд түрінде, шығыстар сметасының жобасы, зияткерлік меншік нысандар туралы мәлімет, жеке куәліктің көшірмесі, мансап орталығынан жұмыссыз ретінде тіркелгені туралы анықтама, зейнетақы қорынан соңғы 6 айға арналған аударымдар туралы анықтама, білімі туралы құжаттың көшірмесі (аттестат, диплом – қажет болған жағдайда тұрғылықты жері бойынша тіркелгенін растайтын құжат тапсыру керек).
Баспасөз мәслихатынан кейін журналистер құжаттар реттеуде қиыншылық тудырылмаса, конкурс талапқа сай өткізілсе деген ой айтты.
Гүлжан ТҰРСЫН
