Биыл Кеңес әскерлерінің Ауғанстаннан шығарылғанына – 36 жыл. Осыған байланысты Ілияс Жансүгіров атындағы Мәдениет сарайында жат жерде қаза тапқан боздақтарды еске алуға арналған шара өтті. Оған қала әкімі Ернат Бәзіл, ардагерлер мен әскери сарбаздар қатысты.
Жиналған жұртшылық алдымен Ауған соғысының ардагерлеріне арналған ескерткішке гүл шоқтарын қойып, тағзым жасады. Шарада Ернат Бәзіл: «Ауған соғысының жауынгерлері Отан алдындағы азаматтық борышын өтеумен қатар қайсарлық пен қажырлылықтың үлгісін көрсетті. Жат жерде қаза тапқан боздақтарға тағзым етіп, ерлігін болашақ ұрпаққа насихаттау біздің борышымыз» дей келе, қала әкімі 30-ға жуық Ауған соғысы ардагеріне облыс және қала әкімінің Алғыс хаттарын табыстады.
Сонымен қатар, «UAE SWAT Challenge» атты халықаралық сайыста үздік нәтиже көрсеткен әскерилерді марапаттады. Айта кетейік, ҚР Ұлттық ұланы 5514 әскери бөлімінің «Бүркіт» жасағы жауынгерлері әлемнің 80 елінен 105 команда қатысқан жарыста үздік ондыққа енген еді.
Осыдан кейін Ауған соғысы ардагерлері сөз алып, он сегізінде от кешкен азаматтардың ерлігі ешқашан ұмытылмайтынын айтты.
Жиын соңы ардагерлерге арналған мерекелік концертке ұласты. Осыдан кейін «Жастар» спорт сарайында Ауған соғысының қаһарманы, қазақтың «Қара майоры» атанған Борис Керімбаевтің жүлдесі үшін мұғалімдер арасында волейболдан турнир өтті.
Айдар ҚАЛИЕВ
Талдықорған қаласы
