«Қазақстан теміржолы» ұлттық компаниясы мемлекетіміздің 2022-2025 жылға дейінгі аралықты қамтитын «Қуатты аймақтар – еліміздің даму драйвері» атты ұлттық жобасы аясында ұзындығы 835 шақырымдық Достық – Мойынты екінші теміржолын салуда.
Теміржол жолағы Жетісу өлкесінің 278 шақырымын қамтып өтсе, оның 144 шақырымы Сарқан ауданының Лепсі ауылдық округіне қарасты аумаққа тиесілі болмақ.
«Ауқымды жобаның өңірге тигізер пайдасы зор. Осындай ірі әрі тиімді жобалардың арқасында ауданға инвестиция тартылып, жаңа жұмыс орындары ашылып, өңіріміздің одан әрі дамуына өз септігін тигізеді», – дейді аудан әкімі Ғалымжан Маманбаев.
Құрылыс жұмыстары кезінде теміржолдың Жетісу облысына қарасты аумағында 1200-ден аса адам уақытша жұмыс жасаса, шойын жолды пайдалану кезінде 340 адам тұрақты жұмыспен қамтылады деп жоспарлануда. Бұл өз кезегінде өңірдегі жұмыссыздықтың азаюына ықпал етеді.
Аталған Достық – Мойынты теміржолының екінші жолағы 2025 жылдың екінші жартыжылдығында қолданысқа енеді деп жоспарланған.
Ж. ИГІМАН
Сарқан ауданы
