Ауылшаруашылығын түлету – уақыт талабы. Оның өз себебі де жоқ емес. Қазір әлемде азық-түлік қауіпсіздігі деген мәселе бар. Айтулы түйткілге алпауыт елдердің өзі алаңдаушылық танытады. Оны уақыттың өзі көрсетіп отыр.
Ал, ен байлықтың үстінде отырған дана қазақ «Арпа-бидай ас екен, алтын-күміс тас екен» дегенді айтқан. Шынтуайтына келгенде, тонна-тонна алтын өндіргендерден түйір дән еккеннің озып жатқан жайы бар. Алайда, жерге тұқым сепкеннен көл-көсір табысқа кенеліп кете алмайды ешкім. Дән өнгенше, өніп астық бергенше диқанның маңдайы талай терлейді. Оның үстіне өскен дақылдың зиянкестерден зардап шекпеуі, түрлі ауруға шалдықпауы да күзгі терімде маңызды рөл ойнайды. Осындай ауқымды тақырып Көксу ауданына қарасты Мәулімбай ауылындағы «Кең дала» шаруа қожалығының алқабында өткен «Дала күнінде» таразыланды. Дала еңбеккерлеріне тәжірибе алаңы болған жиынға «Август-Қазақстан» ЖШС мұрындық болды.
Жиынға «Август-Қазақстан» ЖШС, «КазИнвестСоя» ЖШС, «Black Biotechnology» ЖШС сынды егін шаруашылығын инновацияландырып жүрген ірі құрылымдар, Қазақ егіншілік және өсімдік шаруашылығы ғылыми-зерттеу институты өкілдері, дала төсін емген диқандар және облыстың ауылшаруашылық құрылымдары қатысты. Жиында Жетісу облыстық ауылшаруашылығы басқармасының басшысы Нұрдәулет Кененбаев пен Көксу ауданының әкімі Дәулет Халелов сөз тізгінін тартып, диқандардың еңбегін еселі етуде жиынның маңызы зор екенін, инновация мен заманауи әдіс-тәсілдермен бөлісуге оңтайлы тәжірибе алаңы болатынын алға тартты. Сондай-ақ, жетісулық дала еңбеккерлеріне мұндай мүмкіндік сыйлаған «Август-Қазақстан» ЖШС жетекшілеріне алғысын жеткізді.
Жалпы, диқан еңбегінің еселі болмағы бірнеше факторға тәуелді. Әуелгісі – тұқым. Дала еңбеккерлеріне дақылдың өнімділігі көп болуы үшін қоршаған ортаға, климатқа төзімді тұқымдар аса қажет. Жетісу өңірінде Мемлекет басшысының тапсырмасына сай қант қызылшасын егу көлемі артып келеді. Егістік көлемі ұлғайған сайын оған кететін шығын да артады. Тізбектесек, жанар-жағармай, тыңайтқыш, бастысы, адам күші.
Дастанбек САДЫҚ
Суретті түсірген Дмитрий ЕРОФЕЕВ
