2 ақпан – Ұлттық басылым күні. 111 жыл бұрын «Қазақ» газетінің бірінші нөмірі осы датада шықты. Оның бастауында Ахмет Байтұрсынұлы, Әлихан Бөкейханұлы, Міржақып Дулатұлы секілді ұлт зиялылары тұрды. Айтулы мерекеге орай Тіл сарайында «AMANAT» партиясының өкілдері өңірдегі газет тілшілерін құттықтады.
Алаш ардақтыларының қолтаңбасы қалған газет халықтың ақыл-ойын, сана-сезімін жаңа арнаға бұрды. Сондықтан да ұлттық баспасөздің туған күнін салтанатпен атап өту – тарих алдындағы парыз екені ақиқат. Осы тұста Жетісу облысындағы «AMANAT» партиясы филиалының қызметкерлері Ұлттық басылым күнін айырықша атап өтті.
Жиында ҚР мәдениет қайраткері, ақын, журналист Әміре Әрін, «Jetіsý» газетінің бас редакторы Жұматай Әміреев, Қазақстанның құрметті журналисі Жұмахмет Жайлаубаев, Жетісу радиосының жетекшісі Есболат Айдабосын сөз сөйлеп, қазақ баспасөзінің бүгіні мен ертеңі жөнінде сөз қозғады. Салтанатты шараға жиналған жас буынға газеттің шығуына күш-жігерін арнаған Алаш зиялылары жөнінде жан-жақты мағлұмат беріп, газетте жұмыс істеудің қиыншылығы мен қызығы тұрғысында әңгіме өрбітті.
– Баспасөз саласында еселі еңбек етіп, қалам тербеп жүрген барша журналистерді Ұлттық басылым күнімен шын жүректен құттықтаймын. Тілшілер қауымы өңіріміздің саяси, экономикалық және әлеуметтік өмірін мерзімді басылымдарда терең көрсетіп келеді. Осы жолда қаламына адал, сөзіне берік, шындықты ту еткен еңбектері өлшеусіз. Бұқаралық ақпарат құралдарының бірнеше жанры бар. Жалпы журналистерге арналған да, радио қызметкерлеріне арналған да атаулы күн бекітілген. Ал бұл мереке – солардың бәрін біріктіретін тарихи күн, – деді «AMANAT» партиясы Жетісу облыстық филиалының басшысы Арыстанғали Арын.
Айта кетейік, бүгінде Жетісу өңірінде 43 өңірлік БАҚ жұмыс істейді, оның ішінде 18 мерзімді басылым, 22 интернет-басылым (газеттердің сайттары 18), 2 радио, 1 телеарна бар. Облыс аумағында 554 көрнекі үгіт құралдары орналасқан.
Мерекелік жиын соңында өңір баспасөзінде қызмет ететін тілшілерге «AMANAT» партиясының Алғыс хаты табысталды.
Медет ЖҰМАБАЙ
Суретті түсірген Жұмабай МҰСАБЕКОВ
