Мемлекет басшысы Қасым-Жомарт Тоқаевтың төрағалығымен Астанада Жоғары Еуразиялық экономикалық кеңестің шағын құрамдағы отырысы өтті, – деп хабарлайды 7-su.kz ақпараттық порталы.
Президент жиын барысында бүгінгі күннің символикалық мәніне назар аударды. Оның айтуынша, дәл осы күні, 2014 жылғы 29 мамырда Қазақстан елордасында Еуразиялық экономикалық одақ туралы шартқа қол қойылған.
– «Бұл уақиға еуразиялық интеграцияның маңызды кезеңі ретінде есте қалды. Одақ құрылған сәттен бері еуразиялық «бестіктің» басты ынтымақтастық алаңына айналды. Осыған орай, барша әріптесімді Еуразиялық экономикалық одақ күнімен құттықтауға рұқсат етіңіздер. Бірлестік одан әрі дамып, елдеріміз бен халықтарымыздың игілігіне қызмет ете берсін! Бүгінгі шағын форматтағы кездесу барысында біз сыртқы саудаға, жасанды интеллектіні дамыту бастамаларына қатысты маңызды мәселелерді талқылаймыз. Бұл туралы мазмұнды әңгімеміз кеше экономикалық форум аясында басталды. Жиынымыз әдеттегідей конструктивті сипатта өтіп, өзара тиімді шешімдер қабылданатынына сенімдімін», – деді Қазақстан Президенті.
Кеңес отырысына Беларусь Республикасының президенті Александр Лукашенко, Қырғыз Республикасының президенті Садыр Жапаров, Ресей Федерациясының президенті Владимир Путин, Армения Республикасының вице-премьері Мгер Григорян және Еуразиялық экономикалық комиссия алқасының төрағасы Бақытжан Сағынтаев қатысты.
Жиын барысында Еуразиялық экономикалық одақ аясындағы ынтымақтастықтың өзекті мәселелері, сыртқы сауда бағыттары мен жасанды интеллект технологияларын дамытуға қатысты бастамалар талқыланды.
