Талдықорған қаласының жұмыспен қамтуды үйлестіру және әлеуметтік бағдарламалар бөліміне қарасты Тұрмыстық зорлық-зомбылық құрбандарына әлеуметтік көмек көрсету орталығы ауқымды жұмыстар атқарды.
Мекемеде арнаулы әлеуметтік қызмет түрлері (әлеуметтік тұрмыстық, әлеуметтік медициналық, әлеуметтік құқықтық, әлеуметтік еңбек, әлеуметтік мәдени, әлеуметтік экономикалық, әлеуметтік психологиялық, әлеуметтік педагогикалық қызмет түрлері көрсетіледі) көрсетіледі. Коммуналдық мемлекеттік мекеме 55 (35 әйел, 20 бала) жатын орынға арналған. Штат бірлігі бойынша 35 маман қызмет көрсетеді.
Ағымдағы жылы әлеуметтік көмекке 156 (44 әйел, 112 бала) адам жүгінді. Мектеп жасындағы қызмет алушылар саны 57, мектепке дейінгі қызмет алушылар саны 55 адамды құрады. Орталыққа тіркелген барлық қызмет алушыларға арнайы әлеуметтік қызмет түрлері көрсетілуде. Қызмет алушылар сапалы азық-түлікпен, гигиеналық заттармен, жатын орынмен толығымен қамтылды.
Орталықта тәулік бойы қалалық телефон арқылы 1301 және 8 (7282) 41-53-13, қосымша вацап нөмірі арқылы 87007108266 қауырт желісі жұмысын жүргізуде.
2024 жылы қауырт желі бойынша орталық көмегіне 198 азаматша жүгінді және жүгінген азаматшаларға психологиялық және құқықтық кеңес берілді. Қауырт желі арқылы жүгінген 44 азаматша орталыққа қабылданды.
Құжаттары жоқ қызмет алушылардың құжаттары рәсімделіп алынды. 6 адамға құжаты жасалынды, 17 қызмет алушыға қорғау нұсқамасы қойылды, 11 қызмет алушы тұрақты жұмысқа орналастырылды. 30 қызмет алушыға электрондық кілттері ашылып, құжаттары рәсімделді. 5 қызмет алушы көп балалы ана есебінде үй кезегіне тұрғызылды. 1 қызмет алушыға баласының денсаулығына байланысты жәрдемақы алуға құжаттары рәсімделді.
Талдықорған қаласында арнайы тақырыпта 2 билборд тақташасы орнатылды. Мекеме тарапынан профилактикалық түсіндіру іс-шара жұмыстары жүргізіліп, 1500-ға жуық арнайы ақпараттық парақшалар таратылды, 28 бейне ролик түсірілді.
«Жетісу-Ақпарат»
