Баршаңызды егемен еліміздің ұлттық мерекесі – Қазақстан Республикасының Тәуелсіздік күнімен шын жүректен құттықтаймын!
Тәуелсіздік – тәңірдің біздің ұрпаққа берген үлкен бақыты, халқымыздың мәңгілік құндылығы. Біз бүгінге дейінгі барлық жетістіктерімізге Тәуелсіздіктің арқасында қол жеткіздік.
Тәуелсіздік алғаннан кейінгі жылдары еліміздің шекарасы бекітіліп, халықаралық аренада мемлекетіміздің беделінің өсуіне бағытталған шаралар жүзеге асты.
Алғаш ядролық қарудан бас тартқан бейбітсүйгіш ел ретінде жаһандық қауымдастыққа танылдық. Егемен ел ретінде Қазақстанның Конституциясы қабылданып, теңгеміз айналымға еніп, Елордамыз әсем қала Астана қаласы бой көтерді.
Қазақстан Республикасының Президенті Қасым-Жомарт Кемелұлы Тоқаевтың Жолдауында «Қазір бізге Тәуелсіздіктің жетістіктерін еселеп, елімізді дамудың жаңа сапалы кезеңіне шығару мүмкіндігі беріліп отыр. Біз бұған жүйелі реформалар жүргізу арқылы қол жеткізе аламыз»- деп атап өткен болатын.
Біздің бүгінгі мақсаттарымыз бен міндеттеріміз тұрғындарымыздың өмірінің сапасы мен тұрмыстық деңгейін көтеруге бағытталған.
Азат елдің ұрпағы ретінде біздің алдымызда тәуелсіздіктің 33 жылында жасалған игілікті істі жоғалтпай, халықтың бірлігін сақтап, ынтымақ пен татулықты одан әрі нығайту, ұлттық рух пен туған тілімізге, ата-баба дәстүріне қамқорлық жасау міндеті тұр.
Барша облысымыздың халқын еліміздің ең ұлық мерекесі – Тәуелсіздік күні мерекесімен тағы да құттықтай отырып, әр шаңыраққа шаттық, амандық тілеймін.
Тәуелсіздігіміздің тұғыры биік, мемлекетіміздің мерейі үстем, еліміздің егемендігі баянды болсын!
Медет Мұқатай,
Жетісу облыстық мәслихатының депутаты
Фото: qazalem.kz
