Бұрын Балқашқа бару үшін жолда көп уақыт кететін, кей жерлерде шұңқырлар да жиі кездесетін. Қазірдің өзінде жолдың бірқатар бөлігі жөнделіп, тегістелді. Жаңа жол толық ашылғанда, көлге бару нағыз демалысқа айналады деген сенім бар.
Туристердің пікірінше, жаңа жол демалыс және мереке күндері кептелісті азайтып, саяхатшылардың санын арттырады. Көл жағасында жаңа демалыс орындарының көбеюі де күтілуде.
Әр барған сайын Балқашқа апарар жолдағы қайта жаңғырту жұмыстарының қарқынды жүріп жатқанын көруге болады. Бұл тек көлік қатынасын жеңілдетіп қана қоймай, аймақтың туристік әлеуетін де арттыруда. Жолдың ені бұрынғыдан кеңейтіліп, жаңа су өткізгіштер мен көпірлер салынды. Қозғалыс қауіпсіздігі күшейіп, тәуліктік көлік ағыны айтарлықтай артты.
Жол бойында демалушыларға арналған арнайы аймақтар, көлеңкелі аялдамалар және санитарлық тораптар орнатылған. Бұл аялдама нүктелері жаздың аптап ыстығында да, қыстың ызғарында да жолаушыларға жайлылық сыйлайды.
Күрделі жөндеуден өткен бұл жол Балқаш көлінің табиғи сұлулығын көруге асыққан мыңдаған қазақстандықтар үшін жаңа мүмкіндіктердің есігін ашты. Жол құрылысшыларының айтуынша, биыл жолдың төменгі қабаттары толық дайындалып, келесі жылы сапалы, қауіпсіз және көркем жол толық пайдалануға беріледі.
Демек, алдағы жылы Балқашқа саяхаттау бұрынғыдан да оңай әрі жайлы болмақ.
Ясын ҚАЛЯКПАРҰЛЫ,
Ақсу ауданы, Ақсу ауылының тұрғыны
