Үкіметте ҚР Премьер-министрінің орынбасары – мәдениет және ақпарат министрі Аида Балаеваның төрағалығымен Кәмелетке толмағандардың істері және олардың құқықтарын қорғау жөніндегі ведомствоаралық комиссияның кезекті отырысы өтті, – деп хабарлайды 7-su.kz ақпарттық порталы.
Аталған комиссия – жасөспірімдер арасындағы құқық бұзушылықтың, қараусыздық пен панасыздықтың алдын алуға бағытталған мемлекеттік органдар мен ұйымдардың қызметін үйлестіретін тұрақты алқалы құрылым.
Кеңес барысында салалық ведомстволар елдегі ахуал жөнінде есеп берді. 2024 жылдың бірінші тоқсанының қорытындысына сәйкес, кәмелетке толмағандар арасындағы құқық бұзушылық деңгейі 8 пайызға төмендегені айтылды.
Жиында комиссияның алдағы кезеңге арналған жұмыс жоспары бекітілді. Құжат өңірлердің жауапкершілігін арттыруды, тәуекел тобындағы балалармен жеке жұмыс жүргізуді, мекемелер арасындағы өзара іс-қимылды жетілдіруді, тәлімгерлік институтын дамытуды және «Қазақстан балалары» тұжырымдамасын аймақтарда сапалы жүзеге асыруды қамтиды.
Одан бөлек, еліміздегі кәмелетке толмағандар істері жөніндегі комиссиялардың құрамы жаңартылып, оның қатарына азаматтық қоғам мен сарапшылар өкілдері енгізілгені белгілі болды. Олар білім беру ұйымдары және құқық қорғау органдарымен бірлесе отырып, алдын алу шараларын іске асыруға қатысып жатыр.
Күн тәртібіндегі негізгі тақырыптардың бірі – жасөспірімдер арасындағы суицидтің алдын алу мәселесі. Бұл бағытта Оқу-ағарту және Денсаулық сақтау министрліктері бірлескен кешенді жоспарды жүзеге асырып келеді.
2024 жылдың шілде айынан бастап суицидтік мінез-құлық белгілері байқалатын балаларды ерте анықтау және олармен жұмыс істеудің бірыңғай алгоритмі енгізілген. Алайда бұл тетіктің өңірлерде қолданылу деңгейі біркелкі емес екені атап өтілді.
Аида Балаева өз сөзінде балалардың өмірі, қауіпсіздігі мен әл-ауқаты мемлекеттік саясаттың негізгі басымдықтарының бірі екенін ерекше атап өтті.
– Балалар – біздің басты құндылығымыз, мемлекеттің болашағы. Сондықтан олардың қауіпсіз ортада өсіп-жетілуі – ортақ міндет. Ведомствоаралық комиссияның мақсаты – барлық күшті біріктіріп, балаларды қорғау жүйесін тиімді ету, – деді министр.
Жиын қорытындысы бойынша білім беру ұйымдарындағы психологтардың жұмысын күшейту, ата-аналармен өзара байланысты жандандыру, тәуекел тобына жататын оқушыларды цифрлық мониторинг арқылы бақылау және алдын алу шараларын жетілдіруге бағытталған нақты тапсырмалар берілді.
