UAE SWAT Challenge халықаралық жарысында қазақстандық арнайы жасақтар жоғары дайындық деңгейін көрсетіп, әлемнің үздік командаларының қатарынан көрінді. Аталған беделді сайыста еліміздің арнайы жасақтары, соның ішінде «Томирис» әйелдер тобы да ерекше шеберлік танытып, жүлделі орындармен оралғаны белгілі. Қазақстан құрамасының сапында Қазақстан Республикасы Ұлттық ұланының әскери қызметшілері де өнер көрсетті. Олардың қатарында майор Диас Ахметбаев пен прапорщик Ақыл Новаев бар.
Жарыстан оралғаннан кейін әскери қызметшілер Жақсылық Үшкемпіров атындағы Талдықорған қаласындағы олимпиадалық резервтің облыстық мамандандырылған мектеп-интернат-колледжінің оқушыларымен кездесті. Онда халықаралық жарыстың ерекшеліктері, қатысушыларға қойылатын талаптар және командалық дайындықтың маңызы туралы айтылды. Оқушылар тарапынан қойылған сұрақтар да аз болған жоқ. Жастар әскери қызметтің қыр-сыры, арнайы жасақтардың дайындығы және халықаралық жарыстарға қатысу тәжірибесі жөнінде қызығушылық танытты. Жиын еркін форматта өтіп, әскери қызметшілер оқушылардың барлық сауалдарына жан-жақты жауап берді.
Майор Диас Ахметбаев жастарға арнаған сөзінде:
«Әлемдік деңгейдегі жарыстарда жеңіске жету – тек физикалық дайындықтың емес, тәртіптің, табандылықтың және командалық рухтың нәтижесі. Егер адам алдына мақсат қойып, соған жүйелі түрде еңбектенсе, кез келген биікті бағындыруға болады», – деп атап өтті.
Кездесу соңында оқушылар әскери қызметшілерге алғыс айтып, естелік суретке түсті. Мұндай тағылымды шаралар жас ұрпақты патриоттық рухта тәрбиелеуге, сондай-ақ олардың ел қорғаны болуға деген қызығушылығын арттыруға ықпал етеді. Ұлттық ұлан сарбаздарының ерлігі мен жетістігі өскелең ұрпақ үшін нағыз үлгі өнеге саналады.
«Жетісу-Ақпарат»
