Сарыөзек ауылында игілікті істер күн санап жалғасын тауып келеді. Соның бірі – табиғат-анаға деген жанашырлық пен туған жерге қамқорлық.
«Таза Қазақстан» бағдарламасы аясында өңірде көптеген шара жүзеге асты. Туған жердің сұлулығын одан да көрікті етуге атсалысқан кербұлақтық тұрғындар жуырда ағаш көшеттерін отырғызып, сауапты істі үлгі етті.
Нақтырақ айтқанда ерлі-зайыпты кәсіпкерлер Жұмакелді Игіліков пен Айтжамал Игілікова Сарыөзек ауылының абаттандыру жұмысына белсене атсалысып, 35 түп қарағай көшетін алып берді. Кәсіпкерлердің демеушілігімен алынған қарағайларды Отан соғысы ардагерлерінің саябағына егіп, елі үшін жанын құрбан еткен батырларға тағзым етті. Сонымен қатар, орталық саябаққа да қарағай көшеттерін отырғызып, тұрғындардың демалысына қолайлы жағдай туғызды. Мұндай шарапатты шараға ауыл жастары мен әскери гарнизонның жеке құрамы қатысты. Үнемі жақсы істің басында жүретін Жұмакелді мен Айтжамал Игіліковтар бұған дейін де қайрымдылыққа қол созып, елдің ыстық ықыласына бөленіп жүрген жандар. Бұл жолы да Мемлекет басшысының тапсырмасына сәйкес «Таза Қазақстан» жобасына да атсалысып, кейінгі болашақ ұрпаққа үлгі көрсетті. Сондай-ақ табиғатқа қамқорлық пен тазалық барша адамзаттың басты парызы екенін іспен дәлелдеді. Жомарттық танытып, туған ауылдың жасыл желекке орануына мұрындық болған демеушілерге ауыл тұрғындары мен үлкендер алғыс білдіріп, алдағы істеріне сәттілік пен береке тіледі.
Бауыржан Қатшыбеков
