Д. Рақышев атындағы филармонияның әншісі Жомарт Тәкебаев Абайдың мәңгілік мұрасына айналған «Көзімнің қарасы» әнін орындаса, ҚР Мәдениет саласының үздігі Бану Лахаева да өз әуенімен көрермен жүрегін тербетті.
Мерекелік сәттің бір бөлігі ретінде Абай ескерткішіне гүл шоқтары қойылып, тағзым жасалды. Ал мектеп оқушылары хакімнің жырларын жатқа оқып, өлең өрнегімен жиынды жандандыра түсті.
Мектеп директорының орынбасары, іс-шара ұйымдастырушысы Қуат Ешпаев:
– Біз Абайды ұлықтау арқылы жас ұрпаққа оның даналығын насихаттаймыз. Ұстаздар ұлы ақынды ұлағаттаудан жалықпайды. Биылғы шараны челлендж түрінде бастап, Ломоносов атындағы №5 орта мектепке эстафета жолдадық, – деп атап өтті.
Рас, ұлы Абайдың сөзі ұлттың бойтұмары. Мектеп қабырғасында өткен бұл тағылымды жиын келешекке рухани азық, ұрпақ санасына өрнек болып қалар игі дәстүрдің айғағы.
Шара барысында сөз алған мектеп директоры Динара Татенова да Абайдың рухани мұрасына деген құрметін жүрек лүпілімен жеткізіп:
– Абайды сүю – өзімізді сүю, ұлттың рухын сүю. Біз мектеп болып қана емес, барша қазақ болып оның асыл сөзін санамызға сіңіріп, жүрегімізде тербетіп жүруіміз керек. Өйткені Абайдың әрбір өлеңі – ғасырлар бойы өлмейтін шырақ, – деді.
Ұлы хакімнің асыл сөзін ұлықтаған бұл күн күллі елдің мерейлі мерекесі. Себебі, Абайдың ойы мәңгілік, сөзі өлмес қазына. Бүгінгі ұрпақ сол қазынаны көздің қарашығындай сақтап, келер ғасырларға аманат етуге тиіс. Жүрегінде Абай оты маздаған ел ешқашан еңсесін түсірмейді.
Санжар СҰЛТАНҒАЗЫ
