Бүгін Алтай мен Атырау, Арқа мен Алатаудың аралығын алып жатқан, шапса ат тұяғы кетіліп, ұшса құс қанаты талатын кең-байтақ ел үшін киелі мереке. Киелі болар жөні бар, 4 маусым елдігіміздің һәм егемендігіміздің, өз алдына дербестігіміздің айғағы – Рәміздер күні. Құт болғай, Қазақ елі!
Біз бақытты һәм армансыз халықпыз. Олай деуге толық негіз бар. Жер деген алып ғаламшарға зер салыңызшы. Саны миллионнан асса да тәуелсіздігін сауғалаған халық көп. Екі елі жері болмаса да елдігін сұрағандар жетіп артылады. Күрдтер, ұйғырлар, шешендер, ингуштар, карелдер мен якуттар… Кейде санауға саусақ жетпейді. Құлдық дәуір өткеннің еншісінде кетті дегенмен кей халық өз дәстүрі мен мәдениетін, салт-санасын ұмытуға шақ қалуда. Ұмытқандары қаншама?! Олардың бар арманы дербестігіне, егемендігіне қол жеткізу. Рәміздерін асқақтатып, бабаларының асқақ арманын ақиқат ету. Ал біз осындай ұлт пен ұлысқа қарағанда бақыттымыз. Көк туымыз көгімізде желбіреп тұр.
Әлемде алпауыт АҚШ деген ел бар. «Әр елдің салты басқа, иттері ала қасқа» дегендей, осы мемлекетте өздеріне қалыпты, бірақ бізге жат көрінер бір қалпы бар. Қандай деймісіз, рәміздерін кез келген жерге жапсыру. Адам есімін табан астына жазуға әбестенбейтін (Голливудта атақты өнер майталмандарының есімі жүргінші жолына жазылған) халық туын киім атаулының барлығында таңбалай салады. Тіпті, іш киімдерге де. Осыны үлгі етті ме, әлемдік онлайн сауданың қызған нүктесі AliExpress сайтында еліміздің рәміздері бедерленген бұйымнан көз сүрінеді. Дастарқаннан бастап, кеудеше, күртеше дегеннің неше атасы табылады мұнда. Бірақ, Көк байрақты еден төсенішіне, шұлыққа, өзге де табан астында болар бұйымдарға бедерлеуі төбеден мұздай су құйып жібергендей әсер қалдырады. Ұлттық кеңістігімізге сай келмейтін осынау құбылыс сұраныс болған соң орын алып отырғаны да рас. Әйтпесе, «Ерді намыс өлтіреді» деген халықпыз. Оған «Өлімнен ұят күшті» дегенді қосыңыз.
Дастанбек САДЫҚ
