Шоқан Уәлиханов атындағы орта мектепте «Шоқан Уәлиханов – ғылымның жарық жұлдызы!» атты ғылыми конференция өтті.
Ұлы ғалым, ағартушының өмірі мен еңбегін тереңірек танытып, оның ғылыми мұрасына құрмет көрсету мақсатында өткен конференцияға Қабанбай ауылдық өлкетану музейінің директоры, ауылдық кітапхана қызметкерлері, мектеп мұғалімдері мен оқушылар қатысты.
Конференция ұйымдастырушы С. Даутбаева аталған игі шараның мәні мен мазмұнына тоқталып, ғылыми дәстүрдің маңыздылығын еске салды. Өз кезегінде оқушылар баяндамаларын оқыды.
Алғашқы баяндамада Ислам Шалқарұлы Шоқан Уәлихановтың балалық шағын, оның санасында қалыптасқан алғашқы ізденістерді сезім мен ойдың үндестігі арқылы жеткізді. Ислам Әлібек атақты ғалымның отбасы мен туған жер тарихын баяндаса, Аяжан Сайын оның саяхаттаудан алған даналығын және әлемге ашық көзқарасын шебер суреттеп өтті. Роман Ковалев Шоқанның тарихшы ретінде қалыптасқан тұлғасын терең талдап, оның ел тарихындағы орнын көрсетті. Амина Талғатқызы, Анастасия Предыбайлова, Дамир Төлеубай, Иван Милютин, Нұрболсын Оспан, Даниал Жаңбырбайлар да Шоқанның сан қырлы таланты бойынша баяндама жасады.
Рухани шара барысында Айша Ғалымжанқызы М. Айтқожинаның «Шоқан ескерткішіне қарап» атты өлеңін оқыса, Алиназар Сағи «Аққан жұлдыз» атты кітап көрмесін дайындап, көрермен назарына ұсынды.
Мектеп директорының оқу ісі жөніндегі орынбасары Н. Данаева, қазақ тілі пәнінің мұғалімі Ғ. Жүнісбеков, орыс тілі пәнінің мұғалімі Л. Кучина өз пікірлерін ортаға салып, Шоқан Уәлихановтың ғылымға, мәдениетке қосқан зор үлесін дәріптеді. Іс-шара соңында шақырылған қонақтар да өз ойларымен бөлісті.
АРДА БИ
Қабанбай ауылы,
Алакөл ауданы
