Талдықорғанда «Құқықтық сана – қоғамға құрмет» атты бейнеролик байқауы өтті. Жалпы жүлде қоры 1 млн теңге болатын байқауға шаһардағы 13 мектептен 112 оқушы қатысып, өзара бақ сынады.
Жауаптылардың сөзінше, байқауды Талдықорған қалалық прокуратурасының бастамасымен, қалалық білім бөлімі ұйымдастырған. Басты мақсат жасөспірімдер арасында болатын қылмыстардың алдын алып, нашақорлық, алаяқтық, суицид сынды заң бұзушылыққа қарсы профилактикалық жұмыстар жүргізу. Сондай-ақ, кәмелеттік жасқа толмағандарға арасында келеңсіз оқиғалардың орын алуына, жыныстық және басқа да зорлық-зомбылықтарға жол бермеу.
Қазылар алқасының шешіміне сай шараны қорытындылаған Талдықорған қаласы әкімінің орынбасары Жеңіс Андабеков оқушы жастар арасында өткен мұндай байқаулардың түрлі қылмысқа жол бермеу бағытында маңызы зор екенін айрықша атап өтіп, жарыс жеңімпаздарын марапаттады. Байқауда жалпы сыннан сүрінбей өтіп топ жарған жеңімпаздар І, ІІ, ІІІ орын және 10 номинация бойынша ақшалай және бағалы сыйлықтарға ие болды. Атап айтсақ, командалық есеп бойынша І орынды М.Ломоносов атындағы №5 орта мектеп-лицейінің командасы жеңіп алса, ІІ орын жүлдесіне Б.Жолбарысұлы атындағы №18 орта мектеп- лицейінің командасы лайық деп танылды. Ал, ІІІ орын жүлдесін қаладағы Ш.Уалиханов атындағы №10 орта мектеп-гимназиясының командасы еншіледі.
Айдын КӘЛІМХАН
