Биылдан бастап атаулы әлеуметтік көмекті тағайындаудың жаңа тәсілдері енгізілді. Еңбек және халықты әлеуметтік қорғау министрлігі көмек алушыларды анықтау мақсатында жұмыспен қамтуды үйлестіру және әлеуметтік бағдарламалар басқармаларының қасынан учаскелік комиссия құруды тапсырған. Негізгі мақсат – тұрғындарды цифрландыру. Учаскелік комиссия отбасының материалдық жағдайына тексеру жүргізіп, көмек көрсетудің қажеттілігі туралы қорытынды шығарады. Бұл орайда, формальді тәсілді болдырмау және автоматтандыру мақсатында «FSM Social» мобильдік қосымшасы іске қосылды.
Учаскелік комиссияның мүшесі мобильді қосымшаға отбасының барлық дерегін енгізеді. Мобильді қосымшаны енгізудің артықшылығы – геолокацияны анықтау. Яғни, көмек алушының нақты қайда тұратыны белгілі болады.
Талдықорған қаласында атаулы әлеуметтік көмек алушылар саны 18,6 мың адамды құрайды. Былтыр жоспар бойынша 348 отбасыға әлеуметтік көмек көрсету керек еді. Әкімдік 2543 отбасын тығырықтан шығарған. Биыл учаскелік комиссия әр үйді аралау кезінде жалғызбасты ана Жанар Омароваға көмек керек екенін анықтаған. Жанар кішкентай сәбиі үш жасқа толмағандықтан жұмысқа шыға алмай отыр. Сондай-ақ, бұл отбасында мүгедек адам бар. Оған да қарайласады. «Отбасының цифрлық картасы» аясында жауапты мамандар Жанарға қол ұшын созбақшы. Бұдан кейін жұмыспен қамтуды үйлестіру және әлеуметтік бағдарламалар бөлімі әр тоқсан сайын тұрғынның коммуналдық төлемақыларын төлеп беретін болды. Жанар Омарова: «Балаларым мен бауырыма қараймын деп жұмысқа шыға алмай отырмын. Үкімет наурыз айына дейінгі үш айдың коммуналдық қызмет құнын төлеп береміз деді. Бұл да біз үшін үлкен көмек», – деп қуанышымен бөлісті.
Талдықорған қалалық жұмыспен қамтуды үйлестіру және әлеуметтік бағдарламалар бөлімінің басшысы Мәди Шәкеновтың айтуынша, биыл 1500 отбасыға атаулы әлеуметтік көмек берілмекші. Шаһар бойынша тұрғындардың әлеуметтік жағдайын анықтау мақсатында 5 учаскелік комиссия жұмыс істейді. Оның құрамында полиция, әлеуметтік қамсыздандыру бөлімінің өкілі және «мансап» орталығының маманы бар.
Шара барысында қайда барып жүгінетіндерін білмей отырған талай адамның отбасы жағдайына байланысты жәрдемақы алатыны анықталған. Бірақ, әркім әртүрлі жағдайға байланысты көмек сұраудың жолын таба алмаған. Енді комиссия мүшелері тұрғын үйлерді аралап, елдің жай-күйін көздерімен көріп, шешім шығарады. Бұл үшін тұрғындар алғыс білдіріп, кейбіреулер үкімет тарапынан берілетін жәрдемақыларын алуға құжаттарын жинастыра бастапты.
Гүлжан ТҰРСЫН
Фото: kp.kz
