Жетісу университетінде «Университет пен колледждердің ғылыми-зерттеу және практикалық қызметін интеграциялау» тақырыбында «дөңгелек үстел» өтті. Жиынға облыс әкімінің орынбасары Марлен Көлбаев, басқарма басшылары және колледж директорлары қатысты. Шара шеңберінде облыстағы кадр қажеттілігінің өңірлік картасы таныстырылды.
Жиынды ҚР Ғылым және жоғары білім министрі Саясат Нұрбек ашып, сөз бастады. Ол қазіргі таңда кәсіби мамандар цифрлық платформаларда қызмет етіп жүргенін анық айтты. Сол сияқты түрлі мекемелермен келісе отырып колледж деңгейіндегі оқу бағдарламаларын жоғары оқу деңгейіндегі оқу бағдарламаларымен ұштастырып, сәйкестендіріп жатқанын сөз етті.
«Дөңгелек үстелге» қатысқан облыс әкімінің орынбасары Марлен Көлбаев, «Мамандығым – болашағым» кеңсесінің басшысы Олжас Сәкенов заманға қажетті мамандық бойынша өз пікірлерін білдірді.
Тұсауы кесіліп отырған картада өңірдегі өнеркәсіп, қайта өңдеу, элек-трификация, мұғалімдік, технология мен ауылшаруашылығына бағытталған мамандар тапшы екені көрсетілген. Кадр тапшылығы мәселесін шешуге бағытталған алғашқы атлас жаңа кәсіптер мен құзыреттерге егжей-тегжейлі шолу жасауға үлкен мүмкіндік туғызып отыр.
– Жетісу университетінің базасында 2023 жылы өңірлік жобалық кеңсе құрылып, университет қызметкерлері форсайт-зерттеу курсынан өтті. Олар Жетісу облысында кадр тапшылығының өңірлік картасын әзірлеп, өңірге қажетті бес бағытты анықтады. Жұмысшы мамандықтар өңірдің дамуына, экономиканың артуына үлкен септігін тигізеді. Соңғы жылдары көп мамандықтарды жоғалтып алдық. Қазір қоғамға жаңадан келіп жатқан мамандықтар бар, жасанды интеллект сияқты. Технология дамып жатқан заманда бізге содан қалыспай, жаңа мамандарымызды даярлап, өңірге қажетті мамандарды дайындауымыз қажет, – дейді І. Жансүгіров атындағы Жетісу университетінің ректоры Ермек Бөрібаев.
Аталған атлас білім беру бағдарламаларын дәл жоспарлауға, кәсіптік және жоғары білім беру жүйесін бейімдеуге, сондай-ақ, өңірдің экономикалық өсуі үшін маңызды салаларды жоғары білікті кадрлармен қамтамасыз етуге көмектеседі.
Медет ЖҰМАБАЙ
