Конституциялық реформа – жаңа тарихи кезеңге жол салған оқиға. Бұл – бағыт-бағдарымызды уақыт талабына сай айқындап, мемлекет мүддесін үстемдей түсетін үдеріс.
Ғылым-білімді, инновацияны және адами капиталды дамыту саласындағы жаңа Конституция жобасы – еліміз бен аймақтарымызды дамытудың негізгі элементі. Қазақстан бұл бағыттарды мемлекеттік қызметтің стратегиялық нысанасы деп таниды. Конституцияның тұжырымдамалық өзгерістері, ең алдымен, мемлекеттің адамға бағдарлануын күшейтуге, Қазақстан халқының өзекті құндылықтары мен қағидаттарын көрсетуге, сондай-ақ, республиканың саяси институттары құрылымының тиімділігін арттыруға бағытталған.
Біз бұл өзгерістерді қолдап қана қоймай, оларды өз қызметімізде белсенді түрде қолданып, жаңа технологиялық жаңалықтарға жол ашып, мемлекетіміздің әлеуетін нығайтуды мақсат тұтамыз. Ашықтық, заң мен тәртіпке негізделген ортақ жауапкершілік арқылы ғана біз алға қойған мақсаттарға қол жеткізе аламыз. Жаңа Конституция – әділетті, заманауи және болашаққа бағытталған Қазақстанды құру жолындағы берік негіз. Мұны саяси оқиға немесе жаңартылған мәтін деп қана емес, мемлекетті дамытудың тегеурінді тірегі деп түсіну шарт.
Конституция жобасы қолданыстағы мәтінді жаңартып қана қоймай, мемлекеттің жаңа құқықтық, институционалдық және әлеуметтік архитектурасын қалыптастырады. Ол қазіргі заманғы сын-қатерлерге бағытталған, адамның құқығы мен бостандығын нығайтады, азаматтық қоғамның рөлін кеңейтеді және саяси жүйенің тұрақтылығын арттырады. Жаһандану жағдайында тарихи-мәдени құндылықтарымызды сақтау да аса маңызды. Жаңару мен даму өз тамырымыздан ажырамай, оған сүйене отырып жүзеге асқанда мәнді болмақ.
Жаңа өзгерістер тәжірибе жүзінде қолданылуына сай тиімділігін көрсетеді деп сенемін. Бұл біртұтас елдің қолдап-қуаттауына, қадірлеп-қастерлеуіне де байланысты. Бір сөзбен айтқанда, жаңа Конституция жобасы – еліміздің өткені, бүгіні мен ертеңі үйлесім тапқан құжат. Ол Қазақстан қоғамының келісімін, өзара түсіністігі мен тұрақтылығын нығайтуға бағытталады.
Қуаныш НОҒАЙБЕКОВ,
Жетісу облыстық тексеру комиссиясының мүшесі
