Кербұлақ ауданында «Dara International» компаниясы екі заманауи жанармай құю бекетін салуды жоспарлап отыр.
Аудан әкімі Қанат Есболатов: «бұл орындарда бензин, қысқы және жазғы дизель отыны, сондай-ақ автокөлік майлары мен қоспалардың негізгі түрлері сатылатын болады. Сонымен бірге газ толтыру стансысы жұмыс істейді. Өйткені көптеген автокөлік иелері сұйытылған газға ауысуда» – дейді.
Мұнда жеңіл және жүк көліктеріне арналған шиналар, жол бойында дәмханалар мен дүкендер ашылады. Ақпаратқа сәйкес, құрылысты аяқтау 2025-2026 жылдарға жоспарланып отыр. Инвестицияның жалпы құны 320 миллион теңгені құрайды. Толық қуатқа жеткенде бұл жанармай құю кешендері жергілікті тұрғындар үшін 80 жұмыс орнын ашады.
Айта кетейік, елімізде автокөліктерге қызмет көрсету үшін нысандардың құрылысы ерекше өзекті. Өйткені Қазақстанда жанар-жағармай материалдарын тұтыну өндіріске қарағанда қарқынды өсуде. Сондай-ақ, ішкі нарықтағы бензиннің бәрін отандық мұнай өңдеу зауыттары қамтамасыз етеді. Қазақстанда 5,6 миллионға жуық автокөлік тіркелген, оның 80 пайыздан астамы жеңіл автокөліктер.
Айгүл Байжұмақызы
Кербұлақ ауданы
Фото: qazaly.kz
