26 маусым күні Қазақстанның басым бөлігінде ауа райы құбылмалы болады. «Қазгидромет» мәліметінше, ел аумағында жаңбыр жауып, күн күркіреуі, кей өңірлерде бұршақ түсіп, желдің күшеюі және шаңды дауылдардың болуы ықтимал.
Синоптиктердің болжамынша, солтүстік-шығыс аймақтарда нөсер жаңбыр күтіледі. Солтүстік-батыс, солтүстік және орталық өңірлерде аптап ыстықтың беті қайтып, ауа температурасы күндіз +23…+28 градусқа дейін төмендейді. Ал оңтүстік пен шығыс өңірлерінде жоғары температура сақталады.
Елордада көшпелі бұлт шығып, түнде аздаған жаңбыр жауып, найзағай ойнайды. Күндіз ауа температурасы +30…+32 градус болады.
Алматы қаласында жауын-шашын күтілмейді. Күндіз ауа температурасы +31…+33 градусқа дейін көтеріледі. Іле Алатауының таулы аймақтарында өткінші жаңбыр мен найзағай болжанып отыр.
Шымкентте жауын-шашынсыз ауа райы сақталады. Күндізгі температура +36…+38 градусқа дейін жетеді.
Жетісу облысында таулы аудандарда өткінші жаңбыр мен күн күркіреуі күтіледі. Алакөл маңында желдің екпіні секундына 30 метрге дейін жетуі мүмкін. Талдықорғанда күн құбылмалы болып, жауын-шашынсыз өтеді. Күндіз ауа температурасы +34…+36 градусқа дейін көтеріледі.
Түркістан, Жамбыл, Қызылорда облыстарында және оңтүстік өңірлерде қатты ыстық сақталады. Кей аудандарда ауа температурасы +41 градусқа дейін көтеріледі.
Батыс Қазақстан, Атырау, Маңғыстау, Солтүстік Қазақстан, Павлодар, Шығыс Қазақстан және Абай облыстарында жаңбыр, найзағай, кей жерлерде нөсер, бұршақ және дауылды жел болады.
Мамандар тұрғындарға ауа райының күрт өзгеруіне байланысты қауіпсіздік шараларын сақтауға, әсіресе жел күшейетін және найзағай болатын аймақтарда сақ болуға кеңес береді.
