Жетісу облысының Көксу ауданында «Жас ұлан» әскери—патриоттық ойынындары өтті.
Оқушылар арасында өткен жарыста аймақтағы 23 мектептен 230 білім алушы өзара бақ сынасты. Табиғат аясында ұйымдастырылған іс-шараға аудан әкімі, маслихат және ардагерлер кеңесінің төрағалары мен әскери саланың жетекші мамандары қатысты.
Жиналған қауым алдында сөз алған аудан әкімі Дәулет Кенжеханұлы жас сайыскерлерге сәттілік тілеп, ізгі тілегін жеткізді. Жалпы бұл жолғы «Жас ұлан» әскери-патриоттық ойыны сапта жүру, әскери кедергілерден өту, автомат шашып-жинау, азаматтық қорғаныс, әскери қалашық, патриоттық ән, мылтық ату, кермеге тартылу, дене көтеру сынды 9 бағытты қамтыды.
Ұйымдастиырушылардың сөзінше, мұндай шаралар жастардың бойына отансүйгіштік асыл қасиеттерді қалыптастырумен қатар олардың әскери тәртіптегі шеберліктерін шыңдап, спорттық жаттығуларды сәтті орындауға жол ашады.
Байқау толық және шағын жинақты мектептер арасында екі топта номинациялар бойынша бағаланды. Толық жинақты мектептер арасында бас жүлдені Нұрмолда Алдабергенов атындағы білім шаңырағының командасы жеңіп алса, жүлделі І орынды Жылқайдар Егінбаев және Қалқа Жапсарбаев атындағы орта мектептің командалары иеленді. Сондай-ақ ІІ орынға Медеубай Құрманов атындағы №2 орта мектеп лайық деп танылса, Алғабас және Зылиха Тамшыбай атындағы орта мектеп ІІІ орын жүлдесін місе тұтты. Ал, шағын жинақты мектептер арасында бас жүлде Бесқайнар ауылдық орта мектебіне, І орын №12 орта мектепке бұйырса, ІІ жүлдені Жамбыл атындағы орта мектептің шабандоздары қанжығалап, Сындыбала Қырықбаева атындағы орта мектеп ІІІ орынға табан тіреді.
Айдын КӘЛІМХАН
