Қаратал ауданы Жаңаталап ауылындағы №15603 әскери бөлімінде жас сарбаздар салтанатты түрде әскери ант қабылдады. Айбынды армия, әлеуеті мықты ел әскерінің бүгінгі іс-шарасы Әуе Қорғаныс Күштері қатарында өтті.
Шараға аудан әкімінің орынбасары Айбек Нұрғазыұлы қатысты. Тарихи сәтті бөлісу үшін әскери бөлімдердің басшылығы, Қарулы Күштердің ардагерлері, сарбаздардың туыстары мен жақындары жиналды.
Отанды қорғау – ұлы міндет. Әскер – тәуелсіздіктің тірегі. №15603 әскери бөлімінде Қарағанды облысынан келген 40-қа жуық сарбаз әскери ант қабылдады. Енді олар еліміздің Қарулы Күштерінің сапын толықтырмақ. Аз уақытта әскери тәртіпке үйреніп, қалған олар Отан алдындағы борышын адал орындауға серт берді. Әр сарбаз өзіне жүктелген міндетті үлкен жауапкершілікпен сезінгені анық. Отанға адал қызмет етуге серт берген жас жауынгерлер елінің амандығы үшін қасқайып тұра алатын сарбаз деген зор атқа ие.
«Жетісу-Ақпарат»
