Биылғы дода 12 түрлі аталымды қамтыды. Оның ішінде тұңғыш рет «Үздік жас жұмысшы маман» номинациясы енгізіліп, еңбек майданында тер төгіп жүрген жас мамандарға да жол ашылды. Жеңімпаздарды облыс әкімі атынан орынбасар Диас Есдәулетов құттықтап, жастық жігерін ел игілігіне арнаған азаматтарға ақ жол тіледі.
Сондай-ақ, белсенді шығармашыл жастардың қауымдастығын қалыптастыруға бағытталған олардың қолданыстағы бастамаларын мемлекет тарапынан қолдау мақсатында «Тәуелсіздік ұрпақтары» бойынша 3 млн. теңгеден 10 грант қарастырылып, жеңімпаздар анықталды. Келіп түскен 108 өтінімнің арасынан оза шапқан он үздіктің арасында «Мал және балық шаруашылық бағытындағы «AquaFlishkz – сапалы өнім» жобасы бойынша Абылай Бекет, «Ветеринария саласы, сиыр мен қойды ұрықтандыру» жобасында Санжар Тілеужан грант иегері болды. Ал Өсімдік шаруашылығы бағытында «OŚIM Agro» экологиялық таза, аэропоникалық өнімдерінде Жантас Байболов жеңімпаз атанды. Сүт өнімдері, қолөнер және шағын өндіріс, агро және экотуризм бағытында да бірқатар жастар жобаның үздіктері деп танылды.
Салтанатты жиында өңірдің мәдени, рухани, әлеуметтік өркендеуіне із қалдырған жас тұлғалар көпшілікке таныстырылды. Мәселен, 500 келінді қамтыған «Жетісудың үздік келіні» жобасының авторы Арайлым Әлімжанова «Үздік жас қоғам белсендісі», талдықорғандық кондитер Жазиля Темірбекова «Үздік жас кәсіпкер» атағын иеленді.
Сондай-ақ, облыстық «Jetіsý» газетінің саясат және заң бөлімінің меңгерушісі Айдар Қалиев «Үздік жас журналист», ауыр атлетикадан халықаралық дәрежедегі спорт шебері, екі дүркін Азия чемпионы Әлихан Әскербай «Үздік жас спортшы» атанды. Ал «Х-фактор» жобасының финалисі, бірнеше халықаралық және республикалық өнер бәйгесінің жеңімпазы, облыстық филармония әншісі Ақбота Сабыржанова «Мәдениет саласының үздік жас көшбасшысы» болып танылды.
Тұңғыш рет тағайындалған «Үздік жас жұмысшы маман» атағына Ақсу қант зауытының төрт жылдан бері адал қызметкері Аруна Кенжеханова лайық деп табылды.
– Еңбегімнің еленуі – мен үшін үлкен мәртебе. Әр жұмысшының маңдай тері бағаланса, бұл – болашаққа сенім береді, – деді ол.
Ал Талдықорған қалалық көпсалалы ауруханасының лор-дәрігері Темірлан Қылышбеков «Медицина саласының үздік жас көшбасшысы», Ақсу ауданындағы «Абубек» шаруа қожалығының басшысы, көпбалалы әке Елдос Әбубеков «Ауыл шаруашылығы саласының үздік жас көшбасшысы» атанды.
«Үздік студент» номинациясының иегері Анель Байділдә биыл үшінші курсқа аяқ баспақ. Ол академиялық ұтқырлық бағдарламасымен алты ай Малайзияда білімін жетілдіріп, халықаралық деңгейдегі байқаулардың жеңімпазы атанған.
Әр жеңімпазға арнайы статуэтка, диплом және сертификат табыс етілді. Бұл марапат бір ғана жекелеген еңбектің емес, тұтас бір ұрпақтың өршіл рухының айғағы. Осының дәлелі болған «Үздік жас журналист» Айдар Қалиев:
– «Jetіsý» газетінде он жылдан бері өңірдің тынысын жазып, елдің үні болуға тырыстым. Өлкенің өркендеуі жолында қаламымнан туған әр жол – менің азаматтық борышым, – деді.
Айта кетер жайт, бүгінде Жетісу облысында 14 пен 35 жас аралығында 200 мыңға жуық жас бар. Солардың ішінен 100-ден астам талапкер бақ сынап, үздіктері оза шапты.
Бұл игі дәстүр – жас буынның жігерін жандырып, отансүйгіштік рухын асқақтата түсетін қастерлі қадам. Өркениет өріне ұмтылған осындай өрелі ұрпақ – ел болашағының нұрлы кепілі.
Санжар СҰЛТАНҒАЗЫ
