Бүгінде облыстық жұмыспен қамтуды үйлестіру және әлеуметтік бағдарламалар басқармасы 2024-2029 жылдарға арналған еңбек нарығын дамыту тұжырымдамасы аясында халықты жұмыспен қамтуға жәрдемдесудің белсенді шараларын жүзеге асыруда.
Мұндай шара жұмыссыздық деңгейін төмендетіп, ел жағдайының жақсаруына мүмкіндік береді. Айта кетейік, биылғы 1 қаңтарда облыстың «Еңбек ұтқырлығы орталығына» 35 жасқа дейінгі 14151 адам өтініш білдіріп, оның 7695-і жұмысқа орналасса, 4492-сі тұрақты жұмыспен қамтамасыз етілді. Бұл жастардың өз ісін тауып, лайықты еңбекақы алып жатқанын көрсетеді. Дегенмен, оң үдерістерге қарамастан ҚР Еңбек және халықты әлеуметтік қорғау министрлігінің 2024 жылға арналған «Цифрлық отбасы картасына» сәйкес Жетісу өңірінде NEET санатындағы жастардың саны 8308 адамды құрап отыр.
Осы мәселеге орай аймақта жастардың әлеуметтік-мәдени дамуын қолдауға, олардың жұмыспен қамтылуын және кәсіпкерлік бастамаларын ынталандыруға бағытталған мемлекеттік жастар саясатын дамытудың 2025-2026 жылдарға арналған тұжырымдамасы әзірленді. Мемлекеттік әлеуметтік тапсырыс аясында ауыл жастары мен NEET санатындағы жастардың кәсіби дамуына, сондай-ақ, кәсіпкерлік арқылы олардың әлеуетін толық іске асыруға бағытталған жоба жүзеге асырылуда.
Сонымен бірге Талдықорған, Текелі қалаларында жастарға кеңес беру үшін жастар орталықтары мен базарларда жылжымалы пункттер ашу жоспарланып отыр. Бұл бос уақытты тиімді пайдалануға және ақпараттық-кеңес беруге көмек көрсетуге ықпалын тигізеді.
А. Ыбырай
Фото: minsknews.by
